5 dekabr kuni O’zbekiston respublikasi bosh prokraturasida respublika huquqni muxofaza qiluvchi organlarining muvofiqlashtiruvchi kengashi bo’lib o’tdi.
Unda dastlabki tergov jarayonida jinoyat ishlarini birlashtirish, ajratish, hududiyligi va tergovga taalluqligi bo’yicha yuborish, tergov muddatlarini xisoblashda qonun talablariga rioya qilinishi, dastlabki tergov va surishtiruv organlari tomonidan jinoyatlar haqidagi ariza va xabarlarning ko’rib chiqilishining qonuniyligi hamda O’zbekiston respublikasining “terrorizmga qarshi kurash to’g’risi”dagi va “jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurash to’g’risi”dagi qonunlari ijrosi ahvoli muhokama qilindi.
Xisoblash, tergov qilish, bu borada fuqarolarning huquq va erkinliklari himoya qilinishini ta’minlash ahvoli tahlil qilinib, sohada yo’l qo’yilgan kamchiliklarni bartaraf etish xususida ko’rsatmalar berildi.
Shuningdek jinoyat haqidagi ariza va xabarlarni hal etishda jinoyat-protsessual qonunchiligi talablariga rioya etilishini ta’minlash borasida yo’l qo’yilgan, ayniqsa, jinoyatni xisobdan yashirishdek jiddiy qonun buzilishi holatlariga barham berilmayotganligi keskin tanqid ostiga olindi.
Bunday salbiy holatlarning vujudga kelish sabab va shart-sharoitlariga alohida e’tibor qaratilib, ularning oldini olishga qaratilgan qat’iy choralar ko’rilish lozimligi ta’kidlandi.
Shu bilan birga “terrorizmga qarshi kurash to’g’risi”dagi va “jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurash to’g’risi”dagi qonunlar talablaridan kelib chiqqan holda, diniy ekstremizm, terrorizm shuningdek, terrorizmni moliyalashtirish va davlatning konustitutsiyaviy tuzumga tajovuz qilish bilan bog’liq jinoyatlarning oldini olish, bunday jinoyatlar yuzasidan olib borilayotgan tergov va tezkor qidiruv ishlari ahvolini yanada yaxshilash, bu boradagi prokuror va idoriy nazoratning ta’sirchanligi va samaradorligini oshirib borish lozimligi ko’rsatib o’tildi.
Turkiston:
O’zbekistonda bu kabi yig’ilishlarni o’tkazishda asosiy e’tibor Islom va musulmonlarga qarshi kurashni yanada kuchaytirishga qaratiladi.
Huquq tartibot organlari “terrorizmni moliyalash” bahonasi bilan qanchadan qancha begunoh insonlarni o’z zakotlarini zolim Karimov qamoqxonalarida nohaqdan diniy ayblovlar bilan jazo muddatini o’tayotgan mazlumlarning oila a’zolariga berganligi sababli uzoq muddatli qamoq jazosiga mahkum etishdi.
Jumladan; Andijon viloyati Qorasuv shahridan bo’lgan 1966 yilda tug’ilgan Botirov Ahmadali 6 yilga va 1954 yilda tug’ilgan 60 yoshga kirayotgan Sotvoldieva Muhabbat opa 5,6 yilga ozodlikdan maxrum etildilar. Ularning qilgan jinoyatlari mazlum xonadonlarga yordam berish orqali “terrorizmni moliyalash” bo’ldi.
Har safar shunday yig’ilishlar bo’lib o’tganidan so’ng musulmonlarga nisbatan zulmlar ortishi odatiy hol edi. Bunga qadar besh vaqt namozini o’qigan erkaklar ham, ro’mol yopingan ayollar ham, mazlum xonadonlarga o’z zakotini bergan, yoki bir kilo paxta yog’i va biror kilo go’sht berib yordam qilganlar ham O’zbekiston konustitutsiyaviy tuzumiga va Karimov hukumatiga xavf solishi mumkin bo’lgan” terrorist” va “ekstremist”larni moliyalash bo’lgan bo’lsa, bu yig’ilishdan so’ng o’z oilasini ta’minlagan dindorlar ham “terroristlarni moliyalagan” bo’lishi hech gap emas.
