Islomiy jamoa bo’lishiga qaramay, demokratik yo’ldan yurishni tanlagan “Musulmon birodarlar” jamoasining faoliyati aynan mana shu demokratik qonunlarga binoan ta’qiqlandi.
Qohira mahkamasi “Musulmon birodarlar” jamoasi va unga qarashli barcha tarmoqlarning faoliyatini ta’qiqlash hamda bu jamoaga oid barcha mol-mulklarni, jumladan uning ko’chmas mulklarini ham musodara qilish haqida farmon chiqardi.
Olingan ma’lumotlarga ko’ra, mahkama “Musulmon birodarlar” jamoasining qo’l ostidagi mol-mulklari borasida tekshiruv olib boradigan qo’mita tashkil qilish haqida ham qaror qabul qilgan.
85 yil muqaddam Shayx Hasan al-Banno tomonidan Islomiy qadriyatlarni qayta tiklash maqsadida asos solingan va Husni Muborak davrida qattiq tazyiqlarga uchragan “Musulmon birodarlar” jamoasi 2011 yilda amalga oshgan inqilobdan so’ng qonuniy tashkilot maqomini qo’lga kiritgan edi.
Biroq hech qancha vaqt o’tmay, demokratik yo’l bilan saylangan “Musulmon birodarlar” jamoasining vakili Muhammad Mursiy ham harbiylar tomonidan hokimiyatdan ag’darilgach, jamoa muvaqqat hukumat tarafidan yana tazyiqqa uchray boshladi.
So’nggi bir oydan beri “Musulmon birodarlar” jamoasi ta’qib ostida, ko’zga ko’ringan etakchilarining ismini turmadagilar ro’yxatidan topasiz. Kuni kecha “Musulmon birodarlar” jamoasining xatoga yo’l qo’yganligini tan olib, Misr xalqidan uzr so’ragan Solih Sulton ham bugun qamoqda.
“Musulmon birodarlar” jamoasining huquqiy komissiyasi bu qarorni “nohaqlik, qonundan tashqari”, ekanligini da’vo qilmoqda. Jamoaning ta’kidlashicha, bu qaror jandarm davlatining yana qaytib kelishidan darakdir.
