Qirg’iziston Milliy xavfsizlik xizmatining ma’lum qilishicha, Osh va Bishkek shaharlarida terror amaliyotlarini uyushtirishni ko’zlagan uch kishi qo’lga olingan.
Milliy xavfsizlik xizmati bergan ma’lumotga ko’ra “Islomiy jihod ittifoqi” guruhining a’zolari deb gumon qilinayotgan Qirg’iziston va Qozoqiston fuqarolari Suriyadagi janglarga qatnashib, aynan o’sha erdan ko’rsatma olib Qirg’izistonga kelgan. Ular ShHT sammiti o’tkaziladigan 13 sentyabr kunlari terrorchilik harakatlari sodir etishni rejalashtirganlikda ayblanmoqda.
Milliy xavfsizlik xizmati tarqatgan tasmada terrorchilikda gumonlanib qo’lga olinganlarning biri shu paytga Asad rejimiga qarshi kurashib kelganini va ikki sherigi borligi, ulardan biri qirg’iz, yana biri qozoq millatiga mansub ekanligini va ular bilan Bishkek, Osh shaharlarida qo’poruvchilik harakatni amalga oshirish uchun yuqoridan ko’rsatma olganini aytadi.
ShHT sammiti chog’ida amalga oshirilishi kerak bo’lgan qo’poruvchilik harakatining oldi olinganligini aytgan Milliy xavfsizlik xizmati bu harakatlar ortida nimalar yotganligi haqida ma’lumot bermadi.
Ammo qirg’izistonlik ba’zi tahlilchilarga ko’ra, bu narsa Milliy xavfsizlik xizmati tomonidan to’qib chiqarilgan soxta hisobotlardan biri bo’lishi mumkin. Jumladan Qirg’iziston parlamenti deputati Joomart Saparbaev Qirg’izistonga Suriyadan jo’natilgan terrorchi guruh haqiqatan ham mavjud bo’lganiga shubha bilan qaraydi.
“Bu faktni, birinchidan, chuqur tekshirish kerak. Bu faktni men tasdiqlanmagan ma’lumot deb bilaman. Albatta, terrorchilik harakatlaridan Qirg’iziston ham saqlangan emas. Biroq bu ma’lumot to’g’ri ekaniga shubham bor”, dedi Joomart Saparbaev.
Qirg’iziston parlamentining ayrim deputatlari ham maxsus xizmat tarqatgan bayonotga ishonmasliklarini, bu ish yuzasidan tekshiruv o’tkazish kerakligini aytmoqdalar.
