Parlament deputati Narimon Tuleev Bishkek shahriga hokimlik qilgan paytda shahar byudjetiga 925 ming dollar miqdorida ziyon keltirganlikda aybdor deb topildi. Bishkek shahar Lenin tuman sudida bu boradagi hukm 29 iyul kuni kechqurun o’qildi.
Prezident Qurmanbek Bakiev hokimiyatdan ag’darilgach, Tuleev muxolifatga qo’shilgan.
Qirg’iziston parlamenti deputati Narimon Tuleev Bishkek meri bo’lib turgan paytida Xitoydan 200 avtobusni davlat xazinasiga ziyon keltirgan tarzda sotib olganlikda ayblanmoqda. U 2012 yilning avgustida hibs qilingan edi. Qirg’iziston muxolifatining taniqli namoyondasi Narimon Tuleev prezident Bakiev hukmronligi davrida Bishkek meri lavozimini egallab turgan. U bishkekliklar orasida so’nggi 20 yilda poytaxt qiyofasini tubdan o’zgartira olgan yagona mer sifatida katta nufuzga ega bo’lgan edi.
Tuleev bilan birga sudlangan Bishkek shahar tuzilmalarining sobiq besh rahbari –Medet Kojobergenov 13 yilga, Valeriy Kornienko, Ruslan Beyshembaev, Bilim Toktobekov 10 yildanga, Bakitbek Sidikov 5 yilga hukm qilindi. Ularning mol –mulklari davlat foydasiga musodara qilinadigan bo’ldi.
– Bu hukmni siyosiy buyurtma deb bilaman. Kim kimga telefon qilgani va meni qanday jazolash kerakligi to’g’risida ko’rsatma berganini vaqti kelganida aytib beraman. Menda bu telefon so’zlashuvlari to’g’risida ma’lumotlar bor. Sudya buyruqni bajarishga majbur bo’layapti, -dedi N. Tuleev.
Sud hukmi bilan Narimon Tuleevning qarindoshlari va oilasiga tegishli bo’lgan bank hisoblari, mol-mulki va hissadorlik jamiyatlaridagi aktsiyalari ham davlat hisobiga musodara qilindi. Advokatlarning aytishlaricha, Qirg’iziston tarixida birinchi marta sudlanuvchining qarindoshlariga tegishli bo’lgan mol-mulk musodara qilinmoqda. Bu esa amaldagi qonunchilikka zid harakat sifatida baholanayapti.
Muholifatchining tarafdorlari ko’tarib olgan shiorda “Biz Tuleevga adolat qilinishini talab qilamiz”, deb yozilgan. Narimon Tuleev tarafdorlari 2012 yildan beri bir necha mitinglarni o’tkazdi.
