Kuzatuvchilar nazarida Misrda jamoatchilik Vashingtondan norozi. Qohira ko’chalarida omma g’azabda.
Misr poytaxtidagi qahvaxona egasi Hoji Husni Mahmudning fikri ko’pchilikniki bilan hamohang.
“AQSh daf bo’lsin. Amerika yoki boshqasi, bizga ular kerak emas. Biz o’z yurtimizda erkinmiz, Amerikasiz ham kunimiz o’tadi, Obamami yoki boshqasi… Amerikaning yordami bizga kerak emas. Olib ketsin hammasini, bizga faqat yurtimiz kerak. Obama, Obama, hey o’sha Obamaga ham, yordamiga ham la’nat”, deydi u g’azab bilan.
Musulmon birodarlar tarafdorlari orasida ham, ularga qarshilar orasida ham birdek, AQShga nisbatan nafrat kuchayib bormoqda. Ular AQShni ikkiyuzlamachilikda ayblashyapti. Ularning nazarida Qo’shma Shtatlar demokratiya, deb bong urayotgan bo’lsa ham Misrdagi harakatlarni sidqidildan quvvatlayotgani yo’q, balki u o’z manfaatini o’ylaydi xolos. Mursiyni ag’darganini da’vo qilayotgan siyosiy faollardan biri Mahmud Badr shunday deydi, “Obama ma’muriyati Bir tomondan demokratiya deydi, ikkinchi tomondan esa Musulmon Birodarlarni quvvatladi. G’azabdamiz, qoralaymiz buni”.
Qohiraning boshqa tarafida esa Musulmon Birodarlar harakati a’zolari ham AQShga la’natlar aytmoqda.
“AQSh Musulmon Birodarlar hokimiyatga kelganida uni tan olib, Muhammad Mursiyni hamkor degan edi. Shunga ko’ra u harbiylar tomonidan prezidentning ag’darilganini harbiy to’ntarish deya tanqid qilish kerak”, deydi ular.
Nega Vashington harbiy to’ntarishni harbiy to’ntarish deb atamayapti? Atasa, kim nima zarar ko’radi? Yordamni qirqishga majbur bo’ladimi? Nega qirqmaydi? Ularning tilidan mana shu savollar yangramoqda.
Misr tarqoq, lekin odamlar qay partiya yoki guruhdan bo’lmasin, Amerikani birdek qarg’amoqda.
