Qirg’iziston Konstitutsiyasi bo’yicha tashqi siyosat prezident, hukumat va Jogorku Kengesh hamkorligida olib borilishi kerak. Birok parlament “Tashqi siyosat borasida” qabul qilgan qonunga ko’ra, tashqi siyosat prezidentning huquqiga aylangan.
Shunga ko’ra, prezident hozirgi paytda tashqi siyosatni o’zi olib bormoqda. Qirg’iziston tashqi siyosatining Rossiyaga qaratilganligini prezident Almazbek Atambaev quyidagicha izohlaydi: – Rossiya bizning qo’shnimiz. Qanday bo’lmasin, baribir aloqa qilamiz. Buning ustiga Rossiya va Qozoqiston bilan bizning o’rtamizda echilmaydigan, talash tortishga sabab bo’ladigan masala yo’q, kelajakda ham bo’lmaydi. Bizning yonimizda turadigan, kerak bo’lsa, biz bilan elkadosh bo’lib dushmanga qarshi turib beradigan kimdir birov bo’lishi kerak.
Ammo sobiq prezident Roza Otunbaeva esa Qirg’iziston mustaqil bo’lgandan buyon yurgizib kelgan ko’p tarmoqli tashqi siyosat maqsadga muvofiq degan fikrda. Uning aytishicha, Qirg’iziston barcha davlatlar bilan hamkorlik qilishi lozim. Bu uning milliy manfaatiga mos keladi. Biroq hozirgi paytda ko’p tarmoqli siyosat eng muhim masala bo’lib qolmoqda, dedi sobiq prezident.
Siyosiy tahlilchi Mars Sarievning fikricha, ko’p tarmoqli siyosat yurgizish uchun hozirgi mahalda imkoniyat torayib bormoqda:
– dunyodagi vaziyat umuman o’zgarib ketdi. Avvalda mavjud bo’lgan xalqaro kelishuvlar va huquqlar ish bermay qo’ydi. Kim kuchli bo’lsa o’shaning aytgani to’g’ri degan vaziyat yuzaga keldi. Shuning uchun ko’p tarmoqli siyosat olib borish Qirg’iziston uchun o’ta qiyin. Shuning uchun Atambaev Rossiyaga yuz burmoqda.
Mars Sarievga ko’ra, shunga karamay Qirg’iziston g’arb-sharq davlatlari bilan muomalasini imkoniyati boricha saqlab qolishi lozim.
