Prezidentligining beshinchi yiliga kirishgan Barak Obamani tashqi siyosatda muhim vazifalar kutmoqda. Yangi yil uning ma’muriyatida vazirlar o’zgarishidan boshlandi. Harbiy sohada ayamasdan pul ishlatish davri o’tdi. Tashqi ishlar va mudofaa vazirliklari, shuningdek, Markaziy Razvedka Agentligida yangi odamlar tayinlandi, deya xabar qiladi “Amerika ovozi”.
Mudofaa vaziri lavozimiga sobiq senator Chak Xeygl nomzodini ko’rsatar ekan, Obama dunyo o’zgarib borayotganini qayd etdi.
“Afg’onistondagi urushni tugatib, harbiylarimiz salomatligi haqida o’ylaylik. Ertangi kun tahdidlariga, ular qay ko’rinishda bo’lmasin, tayyor turishimiz kerak. Jumladan, kiber-hujumlarga”, – deydi prezident.
Chak Xeygl Senatda Afg’oniston haqidagi savollarga javob berdi. Uning aytishicha, u erdan qo’shinlarni olib chiqish bilan ish bitmaydi. “Harbiy missiya yakunlanayotgani AQSh yuzlashayotgan tahdidlar kamayib qoldi degani emas. Mali va Jazoirda ro’y bergan terror hujumlari shuning aksini isbotladi”, – deydi u.
Yaqinda iste’foga chiqqan respublikachi senator Richard Lugarning aytishicha, mudofaa sohasida ayamasdan pul ishlatish davri endi o’tdi. Pentagonda ishlohotlar kutilmoqda.
“Jamiki dasturlar cheklangan byudjetdan kelib chiqqan holda qayta ko’rib chiqilyapti. Lekin AQSh hamon global mas’uliyatlarini bajarishi darkor. Dunyo bo’ylab harbiy bazalarimiz bor”, – deydi Lugar.
Eron va Shimoliy Koreyaning yadroviy dasturlarini to’xtatish AQSh oldidagi ustuvor masalalardan. Senatda qilgan nutqida Jon Kerri Eron rahbariyatiga muzokara eshiklari hamon ochiq ekanini eslatdi.
“Bizning strategiya yadro qurollarini cheklashga emas, bartaraf etishga qaratilgan. Eron vaqtni boy berayapti”, – deydi Kerri.
U xizmatini boshlagan kuniyoq Isroil va Falastin rahbarlari bilan telefonlashib, tinchlik muzokalarini jonlantirishga so’z bergan.
