AQSh va Rossiya Sovuq urush holatiga qaytyaptimi?

409
0

So’nggi paytda AQSh va Rossiya ayrim yo’nalishlarda hamkorlikni to’xtatmoqda. Kuni kecha Rossiya Qo’shma Shtatlar bilan narkotiklarga qarshi hamkorlikka doir bitimdan chiqdi. Sal avvalroq esa Qo’shma Shtatlar Rossiya bilan fuqarolik jamiyatlarini qo’llab-quvvatlashga qaratilgan ishchi guruhidan chiqdi. Kecha, shuningdek, rasmiy Moskva AQShdan go’sht sotib olishni bas qildi.

Ayrim kuzatuvchilarga ko’ra, Kreml AQShda qabul qilingan “Magnitskiy” qonuniga javoban ana shunday yo’l tutmoqda. Bu qonunga ko’ra, Amerika tomonidan inson huquqlarini buzganlikda aybdor topilgan rossiyalik rasmiylar AQShga kiritilmaydi va Amerika banklariga pul qo’ya olmaydi.

Vashingtondagi Gudzon Institutida Rossiya bo’yicha tahlilchi Devid Satterning aytishicha, ruslar go’sht importini taqiqlab, AQSh iqtisodiyotiga zarar etkazmoqchi.

Rossiya Qo’shma Shtatlardan 500 million dollarlik mol va cho’chqa go’shti sotib oladi.

Taqiqqa rasmiy sabab shuki, Amerikadan kelayotgan ayrim go’shtlardan raktopamin chiqqan. Bu chorvani semirtirishga yordam beradigan oziq turi.

Biroq Karnegi Jamg’armasining Moskvadagi vakili Masha Lipmanning aytishicha, bu qaror ortida siyosiy sabab bor.

“Rossiyada anti-amerikanizm, Amerikaga qarshi tashviqot kuchaymoqda. Tuzumni tanqid qilgan faollar obro’sini to’kish uchun qilinayotgan ish b”, – deydi Lipman.

AQShning rossiyalik huquq tartibot organlari bilan hamkorligi ham susayishi kutilmoqda. Qoradori savdosi, xalqaro fohishabozlik, moliyaviy qalloblik, terrorizm, kibernetik jinoyatga qarshi qaratilgan qo’shma dasturlar haqida gap ketmoqda.

Tahlilchi Deyvid Satterning aytishicha, bu G’arb uchun muhim sohalar, chunki rus mafiyasi jahon bo’ylab ish qiladi.

“Ularning faoliyati xaqida Rossiya Ichki ishlar vazirligidan ko’p biladigan idora yo’q”, – deydi ekspert.

Kuzatuvchilar ikki davlat Sovuq urush holatiga qaytayotganini xavotir bilan tilga olmoqda.

Javob qoldiring:

Iltimos, sharhingizni kiriting!
Iltimos, ismingizni bu yerga kiriting

Time limit is exhausted. Please reload CAPTCHA.