Kecha Turkiyaning Shonliurfa viloyatiga qarashli Suruch shahrida yuz bergan portlashdan so’ng Turkiya prezidenti Rajab Toyyib Erdogan terrorga qarshi kurashni amalda boshlashga chaqirdi.
“Shonliurfa viloyatining Suruch shahrida terrorni boshdan kechirdik. Bu terrorda 28 fuqaromiz halok bo’ldi. Yuzga yaqin kishi jarohat oldi. Bu ishni qilganlarni o’z shaxsim va xalqim nomidan la’natlayman. Terrorga qarshi xalqaro hamkorlik ichida bo’lgandan keyin unga qarshi kurashni boshlash lozimdir. Biz buni bir necha yillardan buyon aytib kelamiz. Ammo faqat aytibgina qolavermay amalga o’tish vaqti kelganini alohida ta’kidlab o’tmoqchiman”, dedi prezident Erdogan.
Turkiyaning Suriya chegarasi yaqinida joylashgan Shonliurfa viloyatiga qarashli Suruch shahrida yuz bergan kuchli portlash natijasida halok bo’lganlar soni 32 nafarga etganligi aytilmoqda. Voqea joyida og’ir jarohat olganlar shifoxonada jon taslim qilayotganligi tufayli o’lganlar soni yanada ortishi mumkin. Guvohlarning bildirishicha, Suruch shahrining Amara madaniyat markazida yoshlar jamiyati federatsiyasining uch yuzga yaqin a’zosi yig’ilib Kobanini qayta barpo qilish uchun matbuot bayonoti o’qib eshittirilayotgan paytda kuchli portlash sodir etilgan. Portlashga sabab bo’lgan jonli bombaning 18-19 yoshli ayol ekanligi taxmin qilinmoqda.
