Japarov sobiq prezidentlar bilan uchrashdi
Xabar: Qirg‘iziston prezidenti Sadir Japarov mamlakatning barcha sobiq rahbarlari Asqar Akayev, Qurmanbek Bakiyev, Roza O‘tunboyeva, Almazbek Atambayev va Sooronbay Jeenbekov bilan uchrashganini aytdi.
“Men sobiq prezidentlarni bir dasturxonga atrofiga yig‘dim”, – deb yozdi Japarov o‘z sahifasida.
Prezident matbuot kotibi Erbol Sultanbayev uchrashuv neytral hududda bo‘lib o‘tganini aytgan. Ba’zi nashrlar talqiniga ko‘ra, ular Dubayda uchrashgan.
Japarov, shuningdek, hokimiyat uchun abadiy kurash tufayli Qirg‘iziston uyg‘un rivojlana olmasligini, shu tufayli “Markaziy Osiyoning bir burchagida qolayotganini” aytdi. Uning fikricha, bunday uchrashuvni o‘tkazish mamlakat aholisini birlashtirish nuqtai nazaridan muhim.
“Biz hammani birlashtirgan holda xalqning kelajagi haqida o‘ylashimiz kerak”, – dedi Japarov.
Shuningdek, u “dastlab xalq saylagan va oxiri ayanchli bo‘lgan barcha prezidentlarni yig‘sak, balki bir mushtdek birlashgan yagona xalq bo‘lib qolamiz”, degan o‘y o‘zini uzoq vaqtdan beri qiynaganini ta’kidladi.
Japarovning qayd etishicha, sobiq prezidentlar uning “bir musht bo‘lish” tashabbusini qo‘llab-quvvatlagan. Uning so‘zlariga ko‘ra, ular ham o‘z dardini gapirib, xatolarini tan olgan va bir-birini kechirgan.
Izoh: Bugungi kunda butun dunyoda hukmronlik qilayotgan va Qirg‘izistonda ham tatbiq qilinayotgan kapitalizm tuzumi manfaat – foyda asosiga qurilgan bo‘lib, barcha amallar, o‘lchovlar va munosabatlar ham manfaat asosidan kelib chiqadi. Toki manfaat bor ekan dushmanlar ham do‘stga aylanishi, raqiblar birlashib harakat qilishi mumkin. Agar manfaat bo‘lmaydigan bo‘lsa hatto farzand otasi bilan, aka ukasi bilan aloqa qilmaydi. Manfaat bo‘ladigan bo‘lsa xalq manfaatlariga milliardlab dollar zarar yetkazgan jinoyatchilar oqlanib javobgarlikdan qutulib qolishi mumkin.
Qirg‘izistonning amaldagi prezidenti Sadir Japarov ham bahor yaqinlashib (Qirg‘izistondagi inqiloblar mavsumi) kelayotgani sababli o‘ziga muxolif bo‘lgan kuchlar bilan til topishishga harakatni boshlab yubordi. Sababi Japarov boshqaruviga ham – avvalgi prezidentlar kabi – xalqning ishonchi so‘nib bormoqda. Bugungi kunga qadar Japarov prezidentlikka kelish arafasida bergan va’dalaridan birortasini bajarmadi. Xalqning iqtisodiy holati tobora yomonlashib bormoqda. Oldinda Japarov uchun Jahon banki talabi bilan elektr energiyasi narxini oshirish vazifasi turgan bo‘lsa, chegara masalasi, xususan Kampirobod suv ombori masalasi muxolif kuchlar uchun xalqni ko‘tarishga qulay sharoit yaratib beryapdi. Mamlakatda esa akayevchi, bakiyevchi va atambayevchi kuchlar payt poylab turgani hech kimga sir emas. Japarov mana shu vaziyatni qo‘lga olish va mamlakatda navbatdagi davlat to‘ntarishiga yo‘l qo‘ymaslik ilinjida sobiq prezidentlar bilan uchrashib, ularni rozi qilishga harakat qilmoqda. Japarov uchun avvalgi prezidentlar o‘z boshqaruvi davrida qanday jinoyatlar sodir etgani, xalq va davlat manfaatlariga qanchalik zarar yetkazganlari muhim emas. Uning yagona dardi o‘z taxtini saqlab qolishdan iborat xolos.
Abdurahmon Odilov
