Hindistonga safar qilgan Turkiya prezidenti Rajab Toyyib Erdogʻan “Jamia Millia Islamia” universiteti tomonidan tashkil qilingan marosimda ishtirok etdi. Erdugʻon u yerda qilgan nutqida BMT Xavfsizlik Kengashini Suriya masalasida adolatsizlik qilayotganlikda aybladi.
“BMT Xavfsizlik Kengashidan nima kutiladi? Adolat! Lekin BMT Xavfsizlik Kengashida adolat bormi? Aslo bunday narsa yoʻq. Men buni aytgan paytimda, kim yomon – Erdogʻan yomon. Mayli, biz kimga yaxshi koʻrinishimiz kerak? Bizni dunyo mazlumlari yaxshi koʻrsa, shuning oʻzi bizga yetarlidir”, “Millionga yaqin odamlarni oʻldirgan va davlat terrorini amalga oshirgan Asad hozirgacha davlat rahbarligini egallab turar ekan, Birlashgan Millatlar Tashkilotiga aytiladigan gap qolmadi”, “Suriyaliklar bombardimon qilinishda davom etayotgan boʻlsa, biz uarga eshiklarimizni ochamiz. Zaharli gaz bombalaridan va kimyoviy bombalardan qochayotgan odamlar uchun eshiklarimizni ochmasak, biz ham zolimlardan boʻlib qolmaymizmi? Zulmga rozi boʻlish ham zulmdir”, dedi Erdogʻan.
Turkiston:
Toʻgʻri, BMTning vazifasi mustamlakachi yirik davlatlarning manfaatini himoya qilishdir. Oxirgi paytlarda u AQShning boshqaruvi ostida ish olib borayotganligi hech kimga sir boʻlmay qoldi. Lekin ajablanarli joyi shundaki, Suriyada Asad rejimining hukmronligi BMT Xavfsizlik Kengashi koʻmagi bilan emas, Amerika Qoʻshma Shtatlari koʻmagi bilan davom etib kelmoqda. Shunga qaramay Turkiya bu maslada AQShning yaqin hamkoridir. Hatto u bu borada “AQShga mutlaq itoat” siyosatini qoʻllamoqda. Masalan “Furot Qalqoni” amaliyoti bilan AQShning Suriyadagi loyihalarini amalga oshirib berdi, Halabning qulashiga katta hissa qoʻshdi.
“Zulmga rozi boʻlish ham zulmdir”, degan Erdogʻanning oʻzi Suriya xalqini qirgʻin qilayotgan AQSh samolyotlariga Injirlik va Diyorbakir bazalarini ochib berdi. Bu nafaqat zulmga sherik boʻlish, balki zulmning aynan oʻzginasidir. Oʻsha samolyotlar Suriya xalqini erkagu-ayol, yoshu-qari demay, qirgʻin qilmoqda. Hatto masjidlarni nomozxonlari bilan qoʻshib bombardimon qilayotganligiga butun dunyo guvoh boʻldi.
Shuni unutmaslik lozimki, Suriyada davom etayotgan qirgʻinlar va zulmlarning javobgarligi Turkiya va Saudiya Arabistoni kabi musulmon oʻlkalarning zimmasiga tushadi. Chunki bu davlatlar Suriyadagi vahshiyliklarni toʻxtatib qoʻyish qudratiga egadir.
