Germaniya Federal tashqi ishlar vaziri va Yevropada xavfsizlik va hamkorlik tashkiloti (YeXHT)ning amaldagi raisi Frank-Valter Shtaynmayer 30 mart kuni Markaziy Osiyo respublikalari bo’ylab uch kunlik safarini O’zbekistondan boshladi. Uch kun davomida Shtaynmayzer O’zbekistondan tashqari Qirg’iziston va Tojikistonda ham bo’ladi.
Safari avvalida Frank-Valter Shtaynmayer Markaziy Osiyo strategik ahamiyatga ega mintaqa hisoblanishi, bu erda ulkan iqtisodiy imkoniyatlar bilan birga barqarorlik borasida katta xavf-xatarlar ham borligini va bunga befarq qaray olmasligini ta’kidlagan.
Bu haqda Germaniyaning O’zbekistondagi elchixonasi tomonidan GFR TIV rahbari safari avvalida tarqatilgan ma’lumotda ma’lum qilinadi. “Bir vaqtning o’zida Markaziy Osiyo davlatlari bilan ijtimoiy, madaniy va iqtisodiy sohalardagi aloqalarimizni mustahkamlash uchun hali ulkan salohiyat mavjud. Shu tufayli ham Germaniya va YeHXTning ushbu mintaqada izchil faoliyat yuritishi muhim hisoblanadi”, – deyiladi xabarda.
Germaniya Federal tashqi ishlar vaziri Frank-Valter Shtaynmayer 2016 yil 29 martdan 1 aprelgacha O’zbekiston, Qirg’iziston va Tojikistonga safar qiladi. Uch davlatning barchasida u siyosiy rahbariyat bilan muzokaralar o’tkazadi va fuqarolik jamiyati vakillari bilan uchrashadi. Ikki tomonlama aloqalar bilan bir qatorda asosiy diqqat-e’tibor terrorizmga qarshi kurash, YeHXT doirasida mintaqaviy hamkorlik va o’zaro iqtisodiy aloqalar masalalariga ham qaratiladi.
Shu bilan birgalikda, Shtaynmayer YeHXTning amaldagi raisi sifatida YeHXTning Markaziy Osiyodagi keng ko’lamli ishlari bilan yaqindan tanishishni maqsad qilgan. Germaniya tashqi ishlar vaziriga Germaniya Bundestagi a’zolari, iqtisodiyot va madaniyat sohalari vakillaridan iborat delegatsiya hamrohlik qiladi.
