Ramazon oyi nusrat va birdamlik oyi bo‘lsin!
Alloh Taologa hamdu sanolar bo‘lsin. Olamlarga rahmat qilib yuborilgan Payg‘ambarimiz Muhammad ﷺga, uning oila a’zolariga, sahobalariga va barcha mo‘minlarga salotu salomlar yog‘ilsin.
Buxoriy o‘zining sahihida Muhammad ibn Ziyod orqali ushbu hadisni keltirdi. Muhammad ibn Ziyod aytadi, men Abu Hurayra roziyallohu anhuning bunday deganlarini eshitgandim: Nabiy ﷺ yoki Abu Qosim ﷺ aytdilar:
«صُومُوا لِرُؤْيَتِهِ وَأَفْطِرُوا لِرُؤْيَتِهِ فَإِنْ غُبِّيَ عَلَيْكُمْ فَأَكْمِلُوا عِدَّةَ شَعْبَانَ ثَلاَثِينَ»
«Oyni ko‘rib ro‘zani boshlanglar, oyni ko‘rib ro‘zani tugatinglar. Agar havo bulut bo‘lsa, sha’bonning sanog‘ini to‘la o‘ttiz kun qilinglar».
Bugun, 1446 yil shabon oyining 29 kuni, milodiy 2025 yil 28 fevral, jumadan shanbaga o‘tar kechasida muborak Ramazon hiloli kuzatildi. Natijada, ayrim Islomiy o‘lkalarda hilolni shar’iy ko‘rish bilan ko‘rilgani o‘z tasdig‘ini topdi. Shunga ko‘ra, ertaga, shanba kuni bu yilgi muborak Ramazon oyining birinchi kuni hisoblanadi.
Shu munosabat bilan Qirg‘izistondagi “Hizb ut-Tahrir” Islomiy partiyasi butun dunyo musulmonlarini, jumladan Qirg‘izistondagi mo‘min-musulmonlarini muborak Ramazon oyi bilan chin ko‘ngildan tabriklaymiz.
Ramazon oyi iymon muhiti bilan o‘ralgan. Ramazon oyida taqvo va ma’naviy qadriyatlar ustun bo‘lib, musulmonlar Parvardigori bilan munosabatlarini mustahkamlaydi. Bu muhit musulmonlarni solih amallarga undaydi va muhim amallarning birinchi darajasiga e’tibor qaratishga chorlaydi. Binobarin, Ramazon oyida Qur’oni Karimni go‘zal tilovat qilish bilan birga, Qur’oni Karimning hukmlarini tatbiq etishga ham e’tibor qaratish lozim. Zero, namoz o‘qishning farzligi bilan Alloh Taolo nozil qilgan hukmlar bilan hukm yuritishning farzligi, ro‘za tutishning farzligi bilan Xalifa tiklashning farzligi, haj ziyoratining farzligi bilan jihod qilishning farzligini bir-biridan ajratib qo‘yish mutlaqo durust emas. Chunki Alloh Taoloning hukmlari o‘zaro bir-biriga bog‘liq bo‘lib, unda yakka shaxs, jamiyat va davlat muammolari uchun yechimlar mavjuddir.
Bu yilgi Ramazon oyi Islom dini butun xalqlar qalbidan o‘rin olib, keng tarqalayotgan bir davrga to‘g‘ri keldi. Shuningdek, kufr davlatlari o‘zlari bilan o‘zlari ovora bo‘lib, manfaatlari to‘qnash kelmoqda. Tramp AQSH prezidenti maqomini egallashi bilan manfaatlar to‘qnashuvi yanada kuchaymoqda. U Rossiyani Xitoydan uzoqlashtirish uchun Ukrainadan yuz o‘girmoqda. Yevropa Ittifoqini parchalash va ularga qo‘shimcha bojxona to‘lovlari kiritish rejalarini tuzyapti. Shuningdek, asosiy dushman sifatida Xitoyga qarshi qarorlar qabul qilmoqda. Shu bilan birga musulmonlarga dushmanligini ochiqdan-ochiq e’lon qildi, G‘azoni bosib olish bilan tahdid qildi.
Buning muqobilida, musulmonlar muborak Falastin yerlarini himoya qilishda qattiq turib, qassob Asad rejimini qulatishdi. G‘azo ahli 500 kundan buyon Allohning kalimasini oliy qilish uchun sinovlarga sabr va jasorat namunasini hamda kufr kalimasini yo‘q qilish yo‘lida mardlik va qahramonlik namunasini ko‘rsatdi. G‘azodagi musulmonlarning qat’iyati nafaqat musulmonlarda, balki G‘arb jamiyatida ham silkinishga sabab bo‘ldi. Islom Ummatining bunday sabot bilan turishi u qanchalik azob-uqubat, ochlik, va zo‘ravonliklarga duch kelmasin, yana oyoqqa turishga va azizlikka erishishga qodir ekanini yana bir bor isbotladi. Masalan, salibchilar va mo‘g‘ullar davrida bu Ummat ne-ne musibatlarga duch kelmadi! Biroq u bu musibatlarga qarshi qo‘l qovushtirib o‘tirmadi. Aksincha, Salohiddin Ayyubiy boshchiligidagi qo‘shin Aksoni salibchilardan ozod qildi! Sulton Baybars boshchiligidagi Islom lashkarlari mo‘g‘ullarni Ramazon oyida mag‘lubiyatga uchratdi. Islom yana buyuk davlatga aylandi.
Shunday ekan, bugun musulmonlar uchun, tortib olingan hukumatlarini qaytarib olib, azizlik davriga qaytish vaqti keldi. Shu yerda Islom Ummatining eng sara yetakchilaridan biri bo‘lgan xalifa Umar ibn Xattobning haq so‘zlarini eslatib o‘tish o‘rinlidir. Umar roziyallohu anhu: “Biz xor qavm edik, Alloh Taolo bizni Islom bilan aziz qildi. Agar biz azizlikni boshqa joydan qidirsak, Alloh bizni yana xor qiladi”, degan edi.
Binobarin, qo‘shinlarni safarbar qilish va xoin hukmdorlarni ag‘darib, sun’iy chegaralarni buzib tashlash orqali Ummatni birlashtirish musulmonlarning burchidir. Ana o‘shanda Allohning nusratiga loyiq harakat qilgan bo‘lamiz. Alloh taolo aytadi:
یَـٰۤأَیُّهَا ٱلَّذِینَ ءَامَنُوۤا۟ إِن تَنصُرُوا۟ ٱللَّهَ یَنصُرۡكُمۡ وَیُثَبِّتۡ أَقۡدَامَكُمۡ
“Ey mo‘minlar, agar sizlar Allohga yordam bersangizlar U zot ham sizlarga yordam berur va jang maydonida kadamlaringizni sobit-barqaror qilur”. [47:7].
Hizb ut-Tahrir Qirg‘iziston
