Imomlarga oylik maosh nima maqsadda berilmoqda?
Mamlakat bo‘ylab 4 mingga yaqin masjid imomlariga mart oyidan boshlab 8 ming somdan, yil oxiriga borib, 20 ming somgacha maosh to‘lanadi. Prezident Sadir Japarov Xalq qurultoyida da’vat masalasi haqida gapirar ekan, ushbu masalaga ham to‘xtalib o‘tdi.
Prezidentning fikricha, har bir qishloq mullasi maosh olsa, majburiy ravishda ishlaydi. Ular boshqa din yoki oqimga kirib ketayotganlarni tarbiyalaydi va faqat muftiyga itoat qiladi. Muftiyot odamlarni Hanafiy mazhabiga qaytarish vazifasini mullalarga yuklaydi. Muftiyning gapi ham mullalarga o‘tadigan bo‘ladi.
Bundan avval tuman bosh imom-xatiblariga jami 40 ta avtomobil topshirilgan edi.
Xalq orasida “Yegan og‘iz uyaladi” degan maqol bor. Yuqoridagi qarorlar orqali hukumat imom-xatiblarni davlat xizmatining bir tarmog‘iga aylantirmoqda. Bundan maqsad Islomni mabda sifatida ko‘tarib chiqayotgan musulmonlarga qarshi kufr tuzumi yuklagan vazifalarni amalga oshirishdir. Aniqrog‘i, hukumat mabdaiy Islomga qarshi imomlar armiyasidan foydalanishni ko‘zlamoqda. Bu armiyani tartibga solgandan so‘ng, Islomiy fatvolar chiqarib, musulmonlarni chalg‘itish, ularni g‘ayriislomiy fikr va qonunlarga rozi qilish uchun harakat qilishadi. Buni Turkiya va O‘zbekiston misolida ko‘rib turibmiz.
Prezidentning Hanafiy mazhabi haqidagi gapiga to‘xtaladigan bo‘lsak, aslida prezident va muftiyning o‘zlari bosh bo‘lib, Hanafiy mazhabining fatvolarini yashirishadi. Bunga misol keltiradigan bo‘lsak, Hanafiy mazhabining buyuk ulamolaridan biri Shayx Abu Hafs Ismoil an-Nasafiy “Sharh Akoidi an-Nasafiy” kitobida shunday deydi: “Musulmonlarga shar’iy hukmlarni tatbiq etadigan, hadni (jazo choralarini) joriy qiladigan, davlat chegaralarini qo‘riqlaydigan, musulmonlar qo‘shinlarini tayyorlaydigan, ularning zakotlarini to‘playdigan, zo‘ravonlarni, o‘g‘rilarni, qaroqchilarni tiyib qo‘yadigan, juma va hayitlarni qoim qiladigan, Ummat o‘rtasidagi ixtilof va kelishmovchiliklarni hal qiladigan, haq-huquqlar ustidagi guvohnliklarini qabul qiladigan, valiysi bo‘lmagan yetim va bevalarni ta’minlaydigan, o‘ljani musulmonlar o‘rtasida taqsimlaydigan Xalifaning mavjud bo‘lishi shart va vojibdir”.
Demak, mana shundan ko‘rinib turibdiki, hukumat musulmonlarni chalg‘itish uchun Hanafiy mazhabini bahona qilib olgan. Ular Hanafiy mazhabiga emas, faqat o‘z nafslariga va xo‘jayinlari tomonidan qo‘yilgan talablarga amal qiladilar. Shunday ekan, biz musulmonlar har qanday yolg‘ondan ehtiyot bo‘lib, dinimizni mustahkam ushlashga harakat qilishimiz kerak. Shuningdek, bir-birimizga qarshi ish qilishdan tiyilib, ayrim xatolar bahonasida kufr manfaatiga xizmat qilishdan ehtiyot bo‘lishimiz lozim.
Mumtoz Mavarounnahriy
