Qirg‘iziston-O‘zbekiston chegarasini aniqlash ishlari qayta jonlandi
Qirg‘iziston-O‘zbekiston chegarasini aniqlash ishlari qayta jonlandi. Bu haqda Qirg‘iziston hukumati matbuot xizmati ma’lum qildi.
Rasmiy bildiruvda aytilishicha, ikki davlat chegarasini delimitatsiya va demarkatsiya qilish bo‘yicha hukumatlararo ishchi guruhi navbatdagi uchrashuvni o‘tkazdi.
Uchrashuv chog‘ida Jalolobod viloyatining Olabuqa va Axsi tumanlarida O‘zbekiston bilan bahsli bo‘lib turgan hududlar, shuningdek, 2017 yilning 5 sentyabrida imzolangan chegara shartnomasida qayd etilgan hududlar ko‘zdan kechirilgan.
Xabarda uchrashuv natijasida tomonlar o‘zaro murosaga keldilar, deb aytiladi. Biroq aynan qaysi masalada murosaga kelingani aytilmadi.
24-27 avgust kunlari Qirg‘iziston hukumati delegatsiyasi chegara masalasida Toshkentda muzokaralar o‘tkazgan edi. O‘shanda Qirg‘iziston Bosh vaziri o‘rinbosari Akram Madumarov koronavirus pandemiyasi oqibatida ikki davlat o‘rtasidagi chegarani aniqlash ishlari to‘xtab qolganini bildirgan.
Izoh: Chegara muammolari mustamlaka ostidagi davlatlarning o‘zaro muammolari emas. Balki xalqaro siyosatni boshqarib kelayotgan yirik davlatlar tomonidan atayin ilgari surib kelinayotgan muammolardan biridir. Bu Qirg‘iziston yoki O‘zbekiston hukumatlari tomonidan o‘z manfaatlarini ilgari surib atayin uyushtirib kelinayotgan ish ham emas. Negaki ularning barchasi shu chegaralardagi har qanday muammolardan faqat ziyon ko‘rib kelishadi. Ma’lumki, davlatlararo kelishmovchiliklar ortidan o‘rtalaridagi chegaralarni kuchaytirish yoki umuman berkitib olish bilan yakun topadi. Bu esa har ikki tomon xalqi uchun ijtimoiy, iqtisodiy muammolar keltirib chiqarish bilan bir qatorda, millatlararo mojarolarning kelib chiqishiga ham asos bo‘ladi. Mutamlakachilarga esa aynan shu narsa – chegara mojarolarini sun’iy ravishda keltirib chiqarish orqali o‘z ta’siri ostidagi davlatlarga bosim o‘tkazish, ularni o‘z ra’ylariga qarshi chiqishlariga yo‘l qo‘maslik muhim. Uzoq yillardan beri tinmayotgan, vaqti-vaqti bilan qo‘zg‘atib turilgan qirg‘iz-tojik, qirg‘iz-tojik chegara janjallari bunga yorqin misol bo‘la oladi.
Abudrahmon Odilov
