BMT 176 mln kishiga qashshoqlik xavf solayotganini ma’lum qildi
BMT vakili Olivьe de Shutterning qayd etishicha, dunyo bo‘yicha 176 million kishiga qashshoqlik xavf solmoqda.
Uning hisobotida ta’kidlanishicha, ko‘plab mamlakatlar pandemiya davrida fuqarolarni qo‘llab-quvvatlash bo‘yicha qisqa muddatli choralar qabul qildi, ammo hozirda bu etarli emas.
“Kuniga 3,2 dollarlik bazaviy qashshoqlik darajasidan foydalaniladigan bo‘lsa, yana 176 million kishi qashshoqlikka tushib qolishi mumkin”, – dedi u.
Shutter davlatlarni qashshoqlik va tengsizlikka barham berish uchun yanada qat’iy choralar ko‘rishga chaqirdi. Uning fikricha, jiddiy inqirozdan qochib qutulish imkonsiz, uning oqibatlari esa insoniyatga jiddiy ta’sir ko‘rsatadi.
Qayd etilishicha, dunyo bo‘yicha ko‘plab oilalar o‘z zaxiralarini sarflab bo‘ldi va qiyin ahvolda qolgan.
Izoh: Bugungi kunda dunyo aholisi duch kelayotgan qashshoqlik, ocharchilik va urushlar uchun kapitalizm sababli ekanligi shubhasiz. Rasmiy hisobotlarga ko‘ra, og‘ir iqtisodiy vaziyat tufayli har soniyada bir odam nobud bo‘lmoqda. Jahon bank, Xalqaro valyuta fondi va boshqa sudxo‘rlik asosida tashkil etilgan xalqaro moliyaviy tashkilotlar va BMT kapitalizmning asosiy qurollaridir. Ushbu tashkilotlar rivojlanayotgan mamlakatlarning nochor ahvolda ushlab turish orqali bir xovuch shaxslarni misli ko‘rilmagan darajada boyishlari yo‘lida xizmat qilishadi. Kapitalistlar moddiy foydani qo‘lga kiritish maqsadida shu kabi iqtisodiy inqroz va ocharchiliklarni sun’iy ravishda vujudga keltirishadi. Bugungi kunda koronavirus pandemiyasi bahonasi bilan dunyo ahlini asosiy tirikchilik manbaalaridan mahrum qilib, majburiy karantin choralarini joriy etilishi shundoq ham kunligini kunda topib tirikchilik qiladigan “uchinchi dunyo” davlatlari aholisini ocharchilik yoqasiga olib kelib qo‘ydi. Bu davlatlar byudjetdagi taqchillikni yopish uchun yana shu sudxo‘r tashkilotlardan qarz so‘rashlariga majbur bo‘lishdi. Mana shu ishlarni boshida turgan BMT bugunga kelib dunyo aholisini qashshoqlik va ocharchilik kutib turganini bashorat qilib, ularni bu falokatdan “qutqarmoqchi”.
Abdurahmon Odilov
