Ichki aviareyslar 5-iyunda tiklanadi
Qirg‘izistonda ichki aviareyslar avval aytilganidek 8-iyunda emas, balki 5-iyunda tiklanishiga ruxsat berildi. Juma kundan boshlab jamoat transportida mintaqalararo yo‘lovchilar tashishga ham ruxsat beriladi.
Izoh: Qirg‘izistonda 25-maydan koronavirusga qarshi kurash doirasida kiritilgan karantin cheklovlari engillashtirildi. Jumladan, virusga qarshi sanitar me’yorlarga qat’iy rioya qilingan holda jamoat transport ishiga ruxsat berildi, buyum bozorlari, yozgi kafelar, restoranlar ochildi. Shuningdek, teatr, muzey, ko‘rgazma zallari, basseynlar, sport markazlari va kutubxonalar faoliyati tiklandi.
Bolalarga ta’lim beruvchi tashkilotlar uyushmasi 25-may kuni hukumatga yo‘llagan murojaatida, xususiy bolalar bog‘chalari faoliyatiga ruxsat berishni talab qilib chiqdi. Uyushma o‘z murojaatida nima bo‘lishidan qat’iy nazar xususiy bog‘chalar 1-iyundan boshlab o‘z faoliyatlarini boshlashini va agar ularga qarshi biror chora ko‘rilsa hukumat binosi oldida norozilik namoyishi o‘tkazishga tayyor ekanligini ma’lum qildi. Uyushmaning ushbu murojaati ortidan bosh vazir o‘rinbosari Boronov 5-iyundan boshlab bolalar bog‘chalari faoliyati qayta tiklanishini aytdi. Bundan tashqari, 3-iyun kuni bo‘lib o‘tgan koronavirusga qarshi kurash respublika shtabi majlisida Boronov 25-iyundan boshlab bolalar sog‘lomlashtirish oromgohlari ishga tushirilishini xabar qildi. Ammo, bu safar ham masjidlar ochilishi masalasi kun tartibidan chetda qoldi.
Barcha narsani moddiy manfaat ustiga quruvchi kapitalistik tuzumda insonlarning ruhiy ehtiyojlari bir chetga surib qo‘yilgan. Shu sababli ham rasmiy hukumat davlat byudjetiga foyda keltiruvchi soha va tarmoqlarga bosqichma-bosqich ruxsat berib kelmoqda. Masjidlar esa hech qanday moddiy manfaat keltirmaydi. Bundan tashqari, musulmonlar tomonidan masjidlarni ochish masalasi ko‘ndalang qo‘yilib, hukumatdan talab qilinmayotgani pandemiya bahonasida Islom va uning qadriyatlariga qarshi kurashayotgan mustamlakachilar va ularning malaylariga qo‘l kelmoqda. Agar biz musulmonlar hukumatdan masjidlarni ochib berishini, musulmonlar ustidan mas’ulmiz deb iddao qilayotgan muftiy va muftiyotdan ham shu masalani ko‘tarishni talab qilmasak, rasmiy hukumat turli xil bahonalar bilan masjidlar ochilishini imkon qadar ortga surib boraveradi. Masjidlarimiz ochilishini talab qilaylik!
Abdurahmon Odilov
