Koronavirusdan sog‘aygan shifokorlar ishga qaytdi
Qirg‘izistonda koronavirusdan sog‘ayib ketgan shifokorlar ishga qaytdi. Sog‘liqni saqlash vazirining o‘rinbosari Nurbolot Usenbaevning so‘zlariga qaraganda, 21 aprel holatiga ko‘ra avval COVID-19ni yuqtirgan tibbiyot xodimlaridan 13 nafari sog‘aydi va shifoxonadan chiqarildi.
“Shulardan 6 nafari shifokor, 5 nafari o‘rta tibbiyot xodimi va tibbiyot muassasasining ikki nafar xodimi. Sog‘aygan shifokorlar ishga qaytishdi”, – dedi vazir o‘rinbosari.
Umumiy hisobda COVID-19ga 147 nafar tibbiyot xodimi chalingani aytilmoqda.
21 aprel holatiga binoan Qirg‘izistonda koronavirus infektsiyasiga chalinish bilan bog‘liq 590ta holat qayd qilindi.
Izoh: Qirg‘iziston hukumati koronavirus pandemiyasiga qarshi kurash doirasida xalqaro moliyaviy tashkilotlardan qarz ustiga qarz olib kelmoqda. Mazkur mablag‘larning ma’lum qismi aynan tibbiyot sohasi xodimlarini himoya vositalari bilan ta’minlash uchun sarflanayotgani xabar qilinmoqda. Masalan, Jahon bankidan olgan qarzning 9 million dollari koronavirusga qarshi kurashish uchun ajratilgani xabar qilindi. Ammo, koronavursga qarshi kurashda birinchi safda turgan tibbiyot xodimlarining bu illatni o‘zlariga yuqtirib olmaslik uchun himoya kiyimi va vositalari bilan to‘la ta’minlanmagani ortidan rasman qayd etilgan kasallarning deyarli 4dan birini aynan tibbiyot xodimlarini tashkil etmoqda. Tibbiyot xodimlari bu kasallikka o‘zlari chalinganlari etmaganidek, oila a’zolariga ham yuqtirishgani haqida xabarlar uchrab turipti.
Qirg‘iziston sog‘liqni saqlash vaziri o‘rinbosari Madamin Karataev 21-aprel kuni bo‘lib o‘tgan brifingda tibbiyot xodimlari maxsus himoya vositalari bilan etarli miqdorda ta’minlanmaganini tan oldi.
“Dastlab karantin hududiga himoya kiyimlarisiz kirib ishlagan tibbiyot xodimlari ko‘proq kasallik yuqtirib oldi. Biroq hozir Osh viloyati, Osh shahri va barcha hududlardagi kasalxonalarda tibbiyot xodimlari himoya vositalari bilan to‘liq ta’minlandi, kamchiliklar yo‘q”, – dedi Karataev.
Uning bu so‘zlari voqelikka qanchalik mos kelishi yaqin kunlarda ma’lum bo‘ladi. Agar shundan keyin ham tibbiyot xodimlari orasidan kasallikni yangi yuqtirganlar chiqib keladigan bo‘lsa olinayotgan qarzlar o‘z o‘rniga sarflanmay “xom talash” qilinayotgani aniq bo‘ladi.
Abdurahmon Odilov
