Jeenbekov va Putin mintaqadagi xavfsizlik masalalarini muhokama qilishdi
Qirg’iziston prezidenti Sooronbay Jeenbekov 20-sentyabr kuni Rossiya prezidenti Vladimir Putin taklifiga binoan bir kunlik ish safari bilan Orenburg shahriga uchib bordi. Shu kuni Rossiyaning Orenburg viloyatida joylashgan “Donguz” poligonida “Markaz-2019” harbiy strategik qo’mondonlik-shtab o’quvlarining yakuniy bosqichi bo’lib o’tdi. Mazkur tadbir doirasida Qirg’iziston va Rossiya prezidentlari uchrashib, ikki va ko’p tomonlama hamkorlikning ustuvor masalalarini, shu jumladan, mintaqadagi xavfsizlikni ta’minlash masalalarini ham muhokama qilishdi.
Ma’lumki, 16-sentyabr kuni Botken viloyatining Leylak tumanidagi Maqsad qishlog’iga yaqin yerda qirg’iz-tojik chegarachilari o’rtasida otishma bo’lib, buning natijasida ikki tomondan 4 nafar harbiy halok bo’lgan edi.
Tomonlar sodir bo’lgan xodisada bir-birlarini ayblab chiqishdi. Qirg’iz tomoni mojaroga Tojikiston fuqarolari aniqlanmagan hududda qurilish boshlagani sabab bo’lganini aytib chiqqan bo’lsa, tojik tomoni Qirg’izistonni “aniqlanmagan hududlarda binolar barpo” etishda aybladi. Hatto Tojikiston TIV ixtilofli yerlarda avvalgi kelishuvlarga zid ravishda qurilishlar qura boshlagani uchun Qirg’iziston hukumatiga norozilik notasi yubordi.
Aslida Tojikiston hukumati mustaqil tarzda Qirg’iziston bilan chegarada bu qadar tajovuzkorona harakat olib borishi mumkin emas. Chegaralarda to’xtovsiz davom etayotgan majoro va kelishmovchiliklar Rossiya tomonidan boshqarilayotgani va shu orqali mamlakat janubida yana bir harbiy baza ochish uchun zamin hozirlayotgani ehtimoldan holi emas.
Bundan tashqari, rus hukumatining Afg’oniston vahimasini bo’rttirib ko’rsatishga bo’layotgan harakatlari ham Rossiyaning O’rta Osiyoda o’z harbiy ishtirokini yanada kuchaytirish uchun qilayotgan harakatlar jumlasidandir.
Abdurahmon Odilov
