Putin odamlarni hukumatni hurmat qilishga majbur qilmoqchi
Rossiya Federatsiyasi prezidenti Vladimir Putin soxta xabarlar (fake news) tarqatuvchilar va hukumatga hurmatsizlik bilan munosabatda boʻladigan jismoniy yo yuridik shaxslarni yuqori koeffitsiyentda jazolashni nazarda tutuvchi qonunni imzoladi.
Maʼlum qilinishicha, qonun yetti kundan soʻng kuchga kiradi.
Unga koʻra, soxta xabar tarqatgani uchun jarima 30 mingdan 100 ming rublgacha belgilanishi mumkin. Shuningdek, maʼmuriy huquqbuzarlik sodir etish vositasi ham musodara etilishi koʻzda tutilgan. Yuqori lavozimda faoliyat olib boruvchi shaxs shu ishga qoʻl ursa, jarima 200 ming rublgacha belgilanishi taʼkidlanmoqda.
Bundan tashqari, ommaviy tartibsizliklar, osuda hayotni salbiy oʻzgartiruvchi asossiz xabarlarni tarqatgani uchun jarima miqdori 1 million rubldan oshirildi.
Anʼanaviy matbuot va saytlar qoidaga rioya qilmagan holda ogohlantiriladi va xabarning batamom oʻchirilishi soʻraladi. Rasmiy roʻyxatdan oʻtmagan saytlar bilan ushbu holat yuz bersa, ularga ogohlantirishsiz cheklov qoʻyiladi.
