AQSH Xitoy tovarlariga bojlardan voz kechishi mumkin
AQSH Xitoy tovarlariga bojlardan voz kechish gʻoyasini koʻrib chiqmoqda. Bu haqda The Wall Street Journal munozaralardan xabardor manbalarga tayangan holda maʼlum qildi.
Taʼkidlanishicha, bunday gʻoya moliya vaziri Stiven Mnuchinga tegishli. Nashrning qayd etishicha, bu taklifdan koʻzlangan maqsad, Xitoy bilan savdo muzokaralarida olgʻa siljishga erishish va birgalikda uzoq muddatli islohotlarni amalga oshirish uchun aloqalarni yaxshilashga urinishdir.
Shuningdek, qayd etilishicha, AQSH savdo vakili Robert Laytxayzer bunday qarorga qarshi chiqqan.
Avvalroq Xitoy AQSHning “oʻrnini egallamaslikka” vaʼda bergan edi.
Xitoy tashqi ishlar vaziri Van Ining maʼlum qilishicha, Xitoy “uzurpator” (hokimiyatni yoki birovning huquqini qonunga xilof ravishda tortib olgan shaxs) boʻlishga intilmaydi va kelajakda AQSHning “oʻrnini egallashga” harakat qilmaydi.
Van Ining taʼkidlashicha, amerikalik ayrim siyosatchilarning Xitoy kelajakda “AQSHga shubhasiz chaqiriq tashlashi yoki uning oʻrnini egallashga harakat qilishi” borasidagi tashvishlari notoʻgʻri hisoblanadi. Vazir Xitoy hukumati tinch rivojlanish yoʻliga qatʼiy amal qilishini qoʻshimcha qildi.
