Tramp: Suriyada qolgan ishni Erdogʻan qiladi
AQSH prezidenti Donald Tramp rasmiy Twitter sahifasi orqali Suriya masalasida, yaʼni AQSH harbiylarini u yerdan olib chiqish qarori va Turkiya prezidenti Rajab Toyyib Erdogʻan bilan oʻtkazgan telefon suhbati haqida maʼlumot berdi. Trampning taʼkidlashicha, Suriyada ISHIDning qolgan-qutganini tozalash uchun zarur boʻlgan barcha ishlar Erdogʻanga topshirilgan.
“Turkiya prezidenti Erdogʻan Suriyada ISHIDdan qolganlarni bartaraf etish uchun nima kerak boʻlsa qilishi haqida menga yetarli tarzda maʼlumot berdi. U bu ishni ortigʻi bilan bajaradigan kishidir. Bundan tashqari Turkiya (Suriyaning) yon qoʻshnisi. Bizning askarlar esa uyga qaytayapti”, deya bayonot berdi Tramp.
Prezident Erdogʻan bilan Telefon orqali suhbat olib borganligi va muzokaralar oʻtkazganligiga doir bir necha kun avval bayonot bergan Tramp, suhbat chogʻida u bilan ISHID tashkiloti, Suriyadagi qoʻshma harakat, AQSH harbiylarini u yerdan olib chiqilishi va ikki mamlakat oʻrtasidagi savdo munosabatlari muhokama qilganligini aytgan edi.
Oq Uydan berilgan bayonotda esa, Trampning bu qarori Erdogan bilan oʻtkazgan suhbatga aloqasi yoʻqligi va Tramp Suriya haqida qarorlarni Erdogʻansiz oʻzi qabul qlishi haqida aytilgan edi.
