AQSh Rossiyaga shart qoʻydi
Rossiya 60 kun ichida Oʻrta va kichik masofadagi raketalarni yoʻq qilish toʻgʻrisidagi bitimni bajarishga qaytmasa, AQSh undan chiqib ketadi. Bu haqda 4 dekabr kuni Bryusselda AQSh davlat kotibi Mayk Pompeo maʼlum qildi, deya xabar bermoqda TASS.
“Ushbu 60 kun mobaynida biz Oʻrta va kichik masofadagi raketalarni yoʻq qilish toʻgʻrisidagi bitim doirasiga kiruvchi tizimlarni ishlab chiqarmaymiz, sinovdan oʻtkazmaymiz hamda joylashtirmaymiz. 60 kundan keyin nima sodir boʻlishini koʻramiz”,- deya qoʻshimcha qilib oʻtdi Pompeo.
Davlat departamenti rahbarining taʼkidlashicha, bu pozitsiya AQShning NATO boʻyicha ittifoqchilari tomonidan qoʻllab-quvvatlandi, ular bilan Bryusselda raketa bitimi masalasi muhokama qilingan.
“Bu borada [NATO aʼzolari orasida] toʻliq birdamlik bor”, – deya taʼkidlab oʻtdi AQSh davlat kotibi.
Uning qoʻshimcha qilishicha, Qoʻshma Shtatlar bundan avval bir necha marta Rossiyani Oʻrta va kichik masofadagi raketalarni yoʻq qilish toʻgʻrisidagi bitimga amal qilishga chaqirgan, ammo “hozirgacha ular buni qilayotganiga oid hech qanday belgi yoʻq”.
Oʻz navbatida, Rossiya TIV rasmiy vakili Mariya Zaxarova bu borada bayonot bilan chiqdi.
Uning maʼlum qilishicha, Rossiya Oʻrta va kichik masofadagi raketalarni yoʻq qilish toʻgʻrisidagi bitimga amal qilib kelmoqda.
“Rossiya bu bitim bandlariga qatʼiy rioya qiladi va Amerika tomoni buni biladi”, – dedi Mariya Zaxarova AQSh davlat kotibi Mayk Pompeo tomonidan qoʻyilgan shartga izoh berib.
