Bokoyev: Oʻzbekistonlik ishchilarni patentga oʻtkazish kerak
“Respublika-Ata Jurt” fraktsiyasi deputati Kenjebek Bokoyev Jogorku Kenesh yigʻilishida Qirgʻizistonga kelib ishlayotgan oʻzbekistonliklarni patentlash kerak degan taklifni ilgari surdi.
Deputatning aytishicha, Qirgʻizistonda mehnat qilayotgan oʻzbekistonliklar soni 100 ming nafargacha yetadi.
“Qirgʻizistonliklar Rossiyada patent bilan ishlashadi. Biz ham Oʻzbekistondan kelgan 100 ming nafar migrantni patentga oʻtkazishimiz mumkin. Men davlat migratsiya xizmati vakillari bilan gaplashdim, ular rozi. Agar ruxsatnoma 500 som qilib belgilansa, bir oyda 50 million yigʻiladi. Bitta maktab qurishga yetadigan pul”,- dedi deputat.
Bokoyevning qoʻshimcha qilishicha, ayrim maʼlumotlarga qaraganda, migrantlar kirib kelishda chegarachilarga 2 mingdan 5 ming somgacha toʻlashmoqda.
Qirgʻiziston Davlat soliq xizmati maʼlumotiga koʻra, mamlakatda chet elliklar ham patent olib ishlashlari mumkin. Biroq ishlash uchun uchun avval ular davlat migratsiya xizmatidan ruxsat olishlari, keyin davlat roʻyxatga olish xizmatida roʻyxatdan oʻtishlari va undan keyin DSX ga murojaat qilishlari kerak. Aytish kerakki, patent bahosi qirgʻizistonliklarga qaraganda xorijliklar uchun bir necha baravar yuqori qilib belgilangan.
