Putin: Oʻzbekistonga tashrif davomida salmoqli hujjatlar toʻplami imzolanadi
Rossiya prezidenti Vladimir Putin kelgusi haftada Oʻzbekistonga davlat tashrifini amalga oshirishi, tashrif yakunlariga koʻra qator hujjatlar toʻplami imzolanishi hamda AES qurilishiga start berilishini maʼlum qildi.
“Keyingi haftada Oʻzbekistonga amalga oshiriladigan tashrif davomida Toshkentda prezident Shavkat Mirziyoyev bilan muzokaralar oʻtkazamiz. Muzokaralar yakunlariga koʻra, hukumatlararo va tijoriy hujjatlar paketi imzolanadi”,- degan Putin elchilardan ishonch yorliqlari qabul qilib olish marosimi chogʻida.
Rossiya prezidenti Oʻzbekiston – Rossiyaning strategik hamkori va ittifoqchisi ekanini qayd etgan. Uning eʼtirof etishicha, ikki tomonlama aloqalar barcha sohalarda mustahkamlanmoqda: siyosiy, savdo-iqtisodiy, harbiy-texnik, madaniy-gumanitar sohalar shular jumlasidan.
Putin Shavkat Mirziyoyev bilan birgalikda Oʻzbekistondagi ilk atom elektrostantsiyasi qurilishiga start berishini qoʻshimcha qilgan.
RF prezidentining Oʻzbekistonga tashrifi 18-19 oktyabr kunlari amalga oshiriladi.
Bundan avvalroq Oʻzbekiston va Rossiya hamkorligidagi atom elektr stantsiyasi (AES) Navoiy va Buxoro viloyatlari chegarasida joylashgan Toʻdakoʻl suv ombori yaqinida qurilishi maʼlum qilingandi.
