XXR delegatsiyasi mamlakat kommertsiya vaziri oʻrinbosari Van Shouven boshchiligida savdo masalalari boʻyicha qarama-qarshiliklarni muhokama qilish uchun chorshanba kuni Vashingtonga muzokaralarga yoʻl oldi. Bu haqda Xitoyning Markaziy televideniyesiga tayangan holda RIA “Novosti” xabar berdi.
Muzokaralar 22 va 23 avgust kunlari boʻlib oʻtadi, chunki payshanba kuni AQSh va XXR oʻrtasida oʻzaro bojlar kuchga kiradi. Bojlar ikki tomondan ham umumiy qiymati 16 milliard dollar boʻlgan ikkinchi tovarlar roʻyxati boʻyicha kiritilgan.
Xitoy TIV rasmiy vakili Lu Kan seshanba kuni Vashingtonda oʻtkaziladigan ikki kunlik uchrashuvlar natijasi ijobiy boʻlishiga umid bildirdi. Kan Vashington va Pekin tenglik va oʻzaro ishonch asosida ikkala tomonga ham maʼqul keladigan oʻzaromanfaatli qarorga kela olishiga umid qilmoqda.
Xitoy va AQSh fevral oyidan buyon savdodagi ziddiyatlarni bartaraf etishga qaratilgan 4 raundda muzokaralar oʻtkazdi. Ammo Pekinda boʻlib oʻtgan oxirgi uchrashuvdan soʻng, savdo sohasidagi qarama-qarshiliklarni bartaraf etishga erishilmagach, ikki davlat oʻrtasida aloqalar toʻxtatilgan edi. Shu bilan birga Xitoy tomoni oʻzaro yon bosish va savdo urushini olib borishdan voz kechishni savdo borasida kelishuvning asosiy talablaridan biri sifatida ilgari surgan.
Biroz oldin The Wall Street Journal nashri ikki mamlakat amaldorlariga tayangan holda, Xitoy va AQSh hukumati savdo muzokaralari boʻyicha yoʻl xaritasini tayyorlayotgani haqida xabar berdi. Bu choralar kulьminatsiyasi – noyabr oyidagi AQSh prezidenti Donalьd Tramp va Xitoy yetakchisi Si Tszinpin uchrashuvi boʻlishi koʻzda tutilgan.
