Turkiyaga S-400 qachondan yetkazib berilishi maʼlum qilindi
Rossiya 2019 yilda S-400 zenit-raketa majmuasini Turkiyaga yetkazib berish boʻyicha shartnomani bajara boshlaydi. Bu haqda “Rosoboroneksport” rahbari Aleksandr Mixeyev maʼlum qildi, deya xabar beradi RIA “Novosti”.
“S-400 Turkiyaga. Shartnoma kelishilgan muddatlar asosida amalga oshiriladi. 2019 yilda biz shartnomani amalga oshirishni boshlaymiz”, – dedi u.
Avvalroq, Turkiya prezidenti Rajab Erdogon Rossiyaning S-400 ZRMlari faqatgina omborxonalarda saqlanmasligi, balki kerak boʻlganda ishlatilishi haqida maʼlum qilgandi.
Bundan tashqari, Turkiya hukumati vakillarining bildirishicha, AQSh tomonidan ehtimoliy sanktsiyalar tahdidiga qaramasdan, ular komplekslarga oid kelishuvdan voz kechmaydi.
Oʻz navbatida, Vashingtondan bildirishlaricha, Turkiyaning S-400’ni sotib olishi “Turkiya va AQSh oʻrtasidagi ikki tomonlama munosabatlarga zarba beradi”.
