“Xavfsizligi taʼminlangan” mintaqalar birma-bir Asadga olib berilmoqda
Qozogʻistonning Ostona shahrida Rossiya, Turkiya va Eron davlatlari bilan oʻzlarini Suriya muxolifati deb atab olgan guruh oʻrtasida tuzilgan bitimga binoan eʼlon qilingan Suriyadagi “Xavfsizligi taʼminlangan” mintaqalar birma-bir Asad kuchlarining qoʻliga oʻtmoqda. Mazkur mintaqalar Asad rejimining qoʻliga oʻtish uchun Rossiya va Eron tomonidan amalga oshirilgan harbiy amaliyotlar Turkiyaning koʻz oʻngida va jimgina kuzatuvi ostida davom etmoqda. Vaholangki shartnoma boʻyicha, bu mintaqalarning xavfsizligini yuqoridagi uch davlat oʻz zimmalari olgan va xavfsizlikni nazorat qilib turish vazifasi Turkiyaga yuklatilgan edi.
Ostonada qabul qilingan qarorlardan foydalanib, kafil davlatlar maydonda amalga oshirgan ishlar bilan, halokat yoqasiga kelib qolgan Asad rejimini jonlantirish koʻzlanmoqda. Janubiy operatsiyalar soʻzchilaridan biri Husayn Abu Shaymaning bildirishicha, bu masala xususida Rossiya hukumati bilan kelishib olingan. Unga koʻra, mintaqadan chiqib ketmoqchi boʻlgan muxolifatchilarga keng yoʻl ochib beriladi.
“Shartnomaga koʻra muxolifatchilar ogʻir qurollarini topshiradi. Rossiya harbiy politsiyasi Iordaniya chegarasidan boshlab, bosqichma-bosqich tarzda mintaqaga kiradi. Shartnomaning amalga osha boshlanishi bilan mintaqani tark etishni istagan muxoliflar oila aʼzolari bilan chiqib ketishlari mumkin”, deydi Abu Shayma.
Asad kuchlari va tarafdorlari mamlakatning janubiy-gʻarbidagi Darʼo shahridan 10 iyundan boshlab muxolifatning nazoratidaga baʼzi nuqtalarni qoʻlga ola boshlagan edi. Mintaqadagi fuqarolarni mudofaa qiluvchi guruhlar Asad va ruslarning hujumlari tufayli oʻz yurtlarini tashlab ketishga majbur boʻlgan tinch aholi soni 350 mingdan oshganini maʼlum qildi.
Shuni unutmaslik kerakki, Darʼo shahri Ostona bitimi jarayonida “Xavfsizligi taʼminlangan” va Turkiya, Eron va Rossiya tarafidan uning xavfsizligi kafolatlangan mintaqalardan biridir.
