Yevropa ittifoqi bir yilda boʻlinib ketishi mumkin
Yevropa ittifoqining kelajagi qil ustida turibdi, uning taqdiri bir yil ichida hal boʻladi. Ushbu fikrni Italiya ichki ishlar vaziri, Bosh vazir oʻrinbosari Matteo Salьvini “Spiegel” nashriga bergan intervьyusida bildirgan.
“Bir yilning ichida birlashgan Yevropa saqlanib qoladimi, yoʻqmi, aniq boʻladi”,- degan vazir.
IIB rahbarining taʼkidlashicha, Italiya bundan buyon migrantlarni qabul qila olmaydi.
“Biz bir kishini ham qabul qila olmaymiz. Aksincha, bir necha kishini joʻnatib yuborishni xohlardik”,- qoʻshimcha qilgan u.
Avvalroq Salьvini Yevrokomissiyaning uchrashuvida migratsiya muammosini hal etish boʻyicha “yoʻl xaritasini” taqdim qilishni vaʼda qilgandi.
Oʻtgan haftada esa Italiya va Malьta hukumati tarkibida 600 migrant boʻlgan “Aquaris” kemasini oʻz portlariga kiritmagan, uni Ispaniya qabul qilgan edi. Bu vaziyat Parij va Rim oʻrtasida mojaro keltirib chiqardi. Frantsiyaning hukmron partiyasi vakili Gabriel Attal Italiyaning pozitsiyasini “koʻngilni aynituvchi” deb atagan, prezident Makron esa Italiyani “tsinizm va masʼuliyatsizlikda” ayblagan edi.
Frantsiyaning tanqidiga javoban Italiya hukumati “doim migrantlardan yuz oʻgirishni maʼqul koʻruvchi ikkiyuzlamachi davlatlarning nasihatini” qabul qilmasligini bildirgan.
