Rossiya Kantdagi bazasini kuchaytirish niyatida
Rossiya Kantdagi aviabazasini kengaytirish va respublikaning janubini ham qamrab olishi mumkin boʻlgan “komponent”larini kuchaytirishdan manfaatdor.
Bu haqda Bishkekda boʻlib oʻtgan parlamentlararo komissiya majlisida harbiy hamkorlik sohasidagi istiqbollarni muhokama qilish vaqtida RF Davlat Dumasining deputati Viktor Zavarzin bayon qildi.
“Kantdagi baza shunchaki baza boʻlishi uchun emas, balki shu mintaqada xavfsizlik boʻlishi uchun bazadir. Baza noyob joyda joylashgan. KXShT va ikkitomonlama hamkorlik doirasida baza strategik vazifani bajaradi… Biz bu bazadagi janubni ham qamrab oladigan komponentlarni kuchaytirish, kengaytirishni istaymiz”, – dedi Zavarzin.
Qirgʻizistonda Rossiyaning ikkinchi harbiy bazasini ochish masalasi oxirgi oʻn yilda vaqti-vaqti bilan muhokama qilib turilipti. Sobiq bosh vazir Sapar Isaqov oʻtgan yili Moskvaga tashrifi chogʻida OAVlarga mintaqa xavfsizligi uchun, qirgʻiz-tojik chegarasida harbiy baza boʻlishi kerakligini bayon qilgan edi. Bu sohadagi ekspertlar, oʻz navbatida, bu masalani jamoatchilik va mutaxassislar bilan muhokama qilish zarurligi haqida fikr bildirishgan edi.
Rossiyaning Kantdagi aviabazasi 2003 yilda ochilgan. Oʻtgan yili unga yana toʻrtta Rossiya obʼekti qoʻshilgan va birlashgan harbiy bazani tashkil qilgan.
