Turkiya tashqi ishlar vaziri: Xitoy bilan hamkorlikni davom ettiramiz
Turkiya tashqi ishlar vaziri Mavlut Chavushoʻgʻli Xitoyga safar qilib, Pekinda davlat rasmiylari bilan uchrashuv oʻtkazgach, Xitoy Davlat maslahatchisi va tashqi ishlar vaziri Vang Yi bilan mushtarak matbuot anjumani oʻtkazdi. Anjumanda Chavushogʻlu Xitoy rasmiylari bilan ikki davlat kelajagiga bogʻliq juda muhim va samarali muzokaralar amalga oshirilganligini bildirdi. Uning taʼkidlashicha, Turkiya hukumati uchun Xitoy bilan aloqani mustahkamash muhim ahamiyat kasb etganligi tufayli u Iyd Ramazon bayramining birinchi kuni boʻlsa ham Xitoyga safarini amalga oshirgan.
“Qayta tiklanadigan energetika va atom elektr stantsiyalari, uchinchi atom elektr stantsiyasini qurish kabi masalalar ustida ham muhokama olib bordik. Bundan tashqari mudofaa sohasida ham birga ishlashimiz mumkin, qoʻshma loyihalarimiz mavjud. Turizm masalasida esa, Xitoydan Turkiyaga kelayotgan sayyohlar soni deyarli 98-100 foizga koʻpaydi” – dedi Turkiya tashqi ishlar vaziri.
Turkiya va Xitoy hukumatlari muhim strategik loyihalarni amalga oshirish uchun birgalikda ish yuritayotganligini aytib oʻtgan Chavushoʻgʻli Turkiya va Xitoy oʻrtasidagi savdo hajmini oshirish istagi borligini bildirdi. Chavushoʻgʻliga koʻra, buning uchun xitoylik biznesmenlar Turkiyada oʻz sarmoyalarini oshirishlari kerak boʻladi.
Chavushoʻgʻli xavfsizlik va “terrorizm”ga qarshi kurash masalalari ham muhokama qilinganligiga toʻxtalar ekan, ikki mamlakat bu borada bir-birini qoʻllab-quvvatlashda davom etishini hamda xavfsizlik va razvedka sohasida hamkorlikni mustahkamlash zarurligini taʼkidladi.
“Xitoyning ayniqsa, muammolarni hal qilishda yuritayotgan siyosatidan biz mamnunmiz. Mintaqaviy masalalar boʻyicha ham, xalqaro masalalarda ham, Xitoy bilan fikr va munosabatlarimiz bir xilligini koʻryapmiz. Xususan, siyosiy va tinch yoʻl bilan hal qilinadigan masalalarda hamkorligimizni davom ettiramiz”, dedi Chavushoʻgʻli.
Turkiya tashqi ishlar vazirining Xitoyga safari Pekin hukumatining Sharqiy Turkistonlik musulmonlarga nisbatan amalga oshirayotgan zulmi eng choʻqqiga chiqqan bir paytga toʻgʻri keldi. Turkiyada muhojirlikda yashayotgan uygʻurlar Turkiya hukumatiga qarata “Butun dunyo musulmonarining umidi sizdan”, deb murojaat yoʻllashiga qaramay, Chavushogʻlu Xitoy hukumatining mintaqadagi muammolarni hal qilishda “xolis va konstruktiv” yondashayotganligini yuqori baholadi.
