Sergey Shoygu navbatdagi “sovuq xabar” bilan Toshkentga keldi
Afgʻonistondagi vaziyat barqarorlashmayapti, bu ushbu mamlakat orqali terrorchilik guruhlarining chegaradosh davlatlarga oʻtishi uchun imkoniyat yaratadi. Bu haqda Rossiya mudofaa vaziri Sergey Shoygu Oʻzbekiston harbiy idorasi rahbari Abdusalom Azizov bilan muzokaralarda aytib oʻtdi. Bu haqida “TASS” xabar bermoqda.
Shoyguning soʻzlariga koʻra, Rossiya va Oʻzbekiston oʻrtasidagi harbiy va harbiy-texnik hamkorlik “mutlaqo aniq va juda muhim xususiyat kasb etadi”.
“Bu albatta, birinchi navbatda Oʻzbekiston chegaralaridagi barcha xavf va tahdidlar bilan bogʻliq. Shu yerda Suriyadan qoʻshni davlatlarga, shu jumladan, Oʻzbekistonga koʻchib oʻtayotgan xalqaro terrorizm xavfining oʻsib borayotganini ham tilga olmaslikning iloji yoʻq”,- dedi u.
Shoygu xalqaro terrorizm xavfining tarqalishi munosabati bilan, Rossiya katta sonli oʻzbekistonlik harbiy xizmatchilarni oʻqitishga, shuningdek, respublikaga harbiy xizmatchilarni tayyorlash uchun oʻqituvchilarni yuborishga tayyorligini maʼlum qildi. U Rossiyadagi oʻquv muassasalarida oʻqiyotgan harbiy mutaxassislar sonini “bir necha foizga emas, bir necha barobar oshirish”ni taklif qildi.
Rossiya vaziri soʻzlariga koʻra, Oʻzbekiston harbiy mutaxassislari Rossiyada yaxshi bilimga ega boʻlmoqda.
“Shuningdek, alohida rejani, yaʼni dasturni tayyorlash ham muhim deb hisoblaymiz, uni esa siz bilan Rossiyada avgustda boʻlib oʻtadigan “Armiya-2018” Xalqaro harbiy-texnik forum chogʻida koʻrib chiqishga umid qilamiz, ushbu jarayonda siz bilan harbiy-texnik hamkorlik boʻyicha hukumatlararo komissiya majlisini ham oʻtkazishimiz mumkin”,- dedi Shoygu.
Sergey Shoygu 21 may kuni Toshkentga keldi. 22 may kuni Oʻzbekiston mudofaa vaziri, general-mayor Abdusalom Azizov Sergey Shoygu bilan muzokaralar olib borishi, unda ikki mamlakat mudofaa vazirliklari oʻrtasida harbiy, harbiy-texnik va harbiy taʼlim yoʻnalishlari boʻyicha oʻzaro hamkorlikning istiqboldagi rejalari xususida soʻz yuritilishi xabar berilgan edi.
“TASS” xabariga koʻra¸ Oʻzbekiston prezidenti Shavkat Mirziëev Rossiya Mudofaa vaziri Sergey Shoyguni qabul qildi.
Protokol boʻyicha oʻtkazilgan rasmiy muzokaralardan soʻng Mirziëev va Shoygu ëpiq eshiklar ortida yakkama-yakka gaplashgan. Bir soatdan oshiq davom etgan bu suhbatda muhokama qilingan mavzular jamoatchilikka maʼlum qilinmadi.
Turkiston:
Oʻzbekiton prezidenti Shavkat Mirziyoyev 15-17 may kunlari AQShga amalga oshirgan rasmiy safari davomida ikki davlat oʻrtasida harbiy va harbiy-texnik hamkorlik sohasida oʻzaro aloqalarini kengaytirish va mustahkamlashga hamda besh yillik harbiy rejani qabul qilish haqidagi bitimni imzolagan edi. Mirziyoyevning bu safari va ikki oʻrtada tuzilgan shartnomalar Rossiya hukumatini xushyor torttirgan shekilli, Mirziyoyev safardan qaytib kelganidan bir necha kun oʻtib, 21 may kuni Oʻzbekiston va Rossiya prezidentlarining telefon orqali gaplashib olishgani maʼlum boʻldi. Telefon muloqotdan keyin esa Rossiya Mudofaa vaziri Sergey Shoygu navbatdagi vahimali xabar bilan Toshkentga keldi.
