Rossiya Suriyaga S-300 zenit majmualarini yetkazib beradi
“Kommersantʼ” nashrining xabar qilishicha, Rossiya rahbariyati yaqin vaqt ichida Suriyaga S-300 “Favorit” zenit raketa majmualari yetkazib berishni rejalashtirmoqda.
Kutilishicha, bu begʻaraz asosda amalga oshiriladi va zenit raketa majmuasi asosida qisqa muddatlarda Suriya havo hujumidan mudofaa eshelonlashgan tizimi yaratishni taʼminlashi lozim. U aviatsiya texnikasi joylashtiriladigan Damashq va boshqa hududlarni oʻqqa tutishdan himoya qiladi.
Harbiy-diplomatik sohadagi manbalar xabariga koʻra, Suriya armiyasiga zenit raketa majmualarini yetkazib berish toʻgʻrisidagi masala deyarli hal boʻlib ulgurgan. Harbiy-texnik sohadagi manba maʼlumotlariga koʻra, Suriya hukumatida bu turdagi yangi tizimlarni sotib olishga “pul yoʻq”, Rossiya esa bu maqsadlar uchun kredit rasmiylashtirishni rejalashtirmayapti, shuning uchun S-300 harbiy-texnik yordam doirasida taqdim etiladi.
Taʼkidlanishicha, S-300 oʻrnatiladigan yerlarda dastlab rossiyalik harbiy maslahatchilarni ham joylashtirish rejalashtirilmoqda, ular suriyalik mutaxassislar harakatlarini muvofiqlashtirib boradi, shuning uchun bu yerlarga zarba berish, manbalar soʻzlariga koʻra, “barcha tomonlar uchun halokatli boʻladi”.
Rossiya tashqi ishlar vaziri Sergey Lavrov 14 aprel kuni Suriyaga uchirilgan raketalarning uchdan ikki qismi urib tushirilganini tasdiqlagan edi.
