Astanada yana Suriya masalasi muhokama qilinmoqda
Qozogʻiston poytaxti Astana shahrida Suriya masalasi boʻyicha uchrashuv boshlandi. Uchrashuvda Turkiya tashqi ishlar Vaziri Mevlut Chavushoʻgʻli, Rossiya tashqi ishlar vaziri Sergey Lavrov va Eron tashqi ishlar vaziri Javad Zarif ishtirok etmoqda.
Qozogʻiston Tashqi ishlar vaziri Qayrat Abdrahmanov yigʻilishning ochilish nutqida bugungi kungacha Astanada sakkiz marta uchrashuv boʻlib oʻtganligini va bu jarayon Suriyadagi tinchlik oʻrnatish sulhi uzoq vaqt amalga oshirilishida katta hissa qoʻshganligini aytib oʻtdi. (Biroq mintaqadagi vaziyat Abdurahmonov bayonotining aksini koʻrsatmoqda. Chunki Astana uchrashuvida Suriyada “Xavfsiz mintaqa”, yaratish ustida bitim tuzilgani va uning xavfsizligini taʼminlash Turkiya, Rossiya va Eron tarafidan kafillikka olingani hammaga maʼlum. Hozirda Rossiya kuchlari tarafidan ayovsiz qirgʻin qilinayotgan va yuzlab tinch aholi, jumladan ayollar va norasida goʻdaklar halok boʻlayotgan Sharqiy Gʻuta ham oʻsha “Xavfsiz mintaqa” sirasiga kiradi. Eng soʻngi olingan xabarda aytilishicha, bozorga qilingan hujumda tinch aholi vakillaridan 61 kishi hayotdan koʻz yumgan. Turkiston tahririyati).
Abdrahmanovga koʻra, uchrashuvda Turkiya, Rossiya va Eron tashqi ishlar vazirlari bir yillik hamkorlik xulosasini va kelgusi davrda tashlanadigan qadamlarni muhokama qiladi.
Astana jarayoni BMT nazorati ostidagi Jeneva uchrashuviga oʻz hissasini qoʻshganligini tilga olgan Abdrahmanov, Suriyaning ayrim hududlarida keskinlik ortib borayotganiga ishora qildi. Shuningdek u Rossiyani AQSh bilan konstruktiv muloqot jarayonini boshlashga chaqirdi.
Rossiya tashqi ishlar vaziri Sergey Lavrov esa Astana jarayoni Suriya inqirozini hal qilishda salmoqli hissa qoʻshganligini tilga olib, “xavfsiz mintaqa” tashkil qilish, minalardan tozalash va mahbuslarning ozod etilishi hamda insonparvarlik yordami bilan taʼminlash mazkur doirada amalga oshirilishini bildirdi. Lavrov AQSh boshchiligidagi koalitsion kuchlar, nomi qanday boʻlishidan qatʼi nazar, terrorchi guruhlar bilan kuchli kurash boshlashini bildirar ekanan, Kreml bu masalada Oq uy bilan tez-tez muhokama olib borayotganiga urgʻu berdi. Lavrovning taʼkidlashicha, Suriyadagi moʻʼtadil muxolifat bilan terrorchilar (demokratik boshqaruvga rozi boʻlmaydigan musulmonlar) oʻrtasi ajratilishi lozim.
Lavrovning soʻzlaridan keyin uch davlat vazirlarining yopiq eshiklar ortidagi uchrashuvi boshlandi. Matbuotchilarga izn berilmagan yigʻilishda yashirincha nimalar xususida kelishib olingani nomaʼlum.
