Netanyahu: Islom hamkorlik tashikilotining hech qanday taʼsiri yoʻq
Istanbulda 57 Islomiy davlat vakillari ishtirokida Islom hamkorlik tashikilotining favqulodda yigʻilishi boʻlib oʻtdi. Yigʻilishda AQSh prezidenti Donald Trampning qaroriga zid ravishda “Quddus Falastin davlatining poytaxti” , deb eʼlon qilindi. Vakillarning taʼkidlashlaricha, Quddusni (Isroil)ning poytaxti sifatida tan olgan Donalьd Trampning qarori huquqiy, tarixiy va axloqiy jihatdan noqonuniydir.
(Isroil) bosh vaziri Benyamin Netanyahu mazkur yigʻilishga oʻz munosabatini bildirar ekan, musulmon davlatlar vakillarining bu qarori Quddusga hech qanday taʼsir koʻrsatmasligini bildirdi. Oʻzining Quddusda joylashgan ofisidan bayonot bergan Netanyahu Quddusning (Iroil) poytaxti boʻlib qolishiga ishora qilib, “Falastinliklarning haqiqatni qabul qilishlari va radikallashuvni bas qilib, tinchlik yoʻlini tanlashlari oʻzlari uchun yaxshilikdir”, dedi.
Ayni paytda Trampning qaroridan ruhlangan yahudiylar Musulmonlarning birinchi qiblasi boʻlgan Masjidul Aqsoga kirib, koʻngli tusagan ishlarini qilishmoqda. Xabarlarda aytilishicha, bugun tong mahalda ham Masjidul Aqsoga bostirib kirgan bosqinchi yahudiylar qoʻshiqlar kuylashib, raqsga tushishgan.
Bu holatga qarshilik qilgan musulmonlar, yosh bola, ayol yoki qari boʻlishiga qaramay, ayovsiz kaltaklanib, qamoqqa olinmoqda. Tramp Quddusni (Isroil)ning poytaxti deb eʼlon qilgan kundan buyon (Isroil) askarlari hujumi natijasida uch kishi shahid boʻldi, 82 kishi turli tan jarohati oldi.
