Qirgʻiziston-Qozogʻiston chegarasidagi vaziyat oʻzgarishsiz qolmoqda
“24.kg” nashri bergan xabarga koʻra, Qozogʻiston bilan chegaradagi “Ak-Jol” va “Ak-Tilek” nazorat-oʻtkazish punktlarida vaziyat hamon murakkab boʻlib turibdi.
Qayd etilishicha, ertalabki soat 8:30da Kant shahri yaqinidagi, chegaraga olib boruvchi yoʻlda taxminan 500 ta mashina navbat kutib turgan.
“Echimi topilmayotgan muammoning uzunligi 9 kilometrni tashkil etadi”,- deya yozadi nashr.
Chegarachilarning soʻzlariga koʻra, bir sutka davomida nazorat-oʻtkazish punktidan taxminan 130 ta yuk mashinasi oʻtgan, bir soat ichida 5-6 ta mashina oʻtkazilmoqda. Yuk avtolari oʻz chizigʻi boʻylab harakatlanmoqda, yengil mashinalar esa navbatda turishibdi.
Uzoq masofalarga yuk tashiydigan haydovchilarning “24.kg” nashriga aytishicha, aslida besh kun avval navbatning eng oxirida turganlar, faqat bugun nazorat-oʻtkazish punktiga yaqinlashgan.
Ularning soʻzlariga koʻra, mahalliy aholi va tashkilotlar oziq-ovqat olib kelib, ularni boqishmoqda.
“Bizga har kuni issiq ovqat olib kelishadi. Qozoq va belaruslarning oʻzlari aytishmoqda, qayerda shunday holatga tushishgan boʻlsa, hech qachon bunday munosabatga duch kelishmagan. Bu boʻyicha qirgʻizlarga gap boʻlishi mumkin emas!” – degan haydovchilar.
Qozogʻiston tomonidan ham yuk mashinalari navbati paydo boʻlgan. Haydovchilarning aytishicha, uning uzunligi ikki kilometrdan ortiq, hamda oʻtkazish imkoniyati ham shunday – soatiga 5 ta mashinadan.
“U yerda navbat nega paydo boʻlganini bilasizmi? Sababi Rossiyadan Qozogʻistonga qoʻyishmagan. U yerda ham yigitlar 10 kunlab kutishgan. Kuni kecha esa ularni kiritishdi, ularning hammasi bu yergacha yetib keldi. Biroq u yerda ularga ovqat berishmagan, buni bu yerga yetib kelgan yigitlardan eshitdik”, – deya qoʻshimcha qilib oʻtishgan haydovchilar.
“Shuning uchun shu yerda turibmiz, Talasga borishni hech kim xohlamaydi. Biznikilar-ku oʻtkazmoqda, qozoqlar – yoʻq. Biroq biz oʻzaro urushayotganimiz yoʻq, bu borada bizda hammasi joyida”, – degan ular.
Nashrning taʼkidlashicha, ertalabki soat 10.30da bu postda taxminan 40 ta avtomashina toʻplangan – yengil, yuk mashinalari va yoʻlovchi transporti.
“Tungi soat 12da kelgandim, hozir mana soat 10.34, hali ham turibman. Bir soatda 1-2 mashinani oʻtkazishmoqda”, – deya aytib oʻtgan haydovchilardan biri.
