Nazarboyev chegaradagi muammolarni bartaraf etish boʻyicha farmoyish bermagan
Qozogʻiston bosh vaziri matbuot xizmati Bishkek tomonidan tarqatilgan “prezident Nazarbayev chegarada paydo boʻlgan barcha muammolarni bartaraf etish toʻgʻrisidagi farmoyishi”ni inkor qildi. Qozogʻiston bosh vaziri saytida 12 oktyabr kuni kechqurun eʼlon qilingan bayonotda taʼkidlanishicha, “aslida hukumatga mazkur masala boʻyicha hukumatlararo maslahatlashuv oʻtkazish topshirildi”.
Qozogʻiston bosh vaziri matbuot xizmati bayonotida qayd qilinishicha, Sochida boʻlib oʻtgan Yevroosiyo Iqtisodiy Oliy Kengashi majlisi doirasida Qozogʻiston prezidenti va Qirgʻiziston bosh vaziri oʻrtasida muloqot boʻlib oʻtmagan.
“Isaqovning davlatimiz rahbari oldiga qisqa tashrifi boʻldi”,- deyiladi Qozogʻiston bosh vaziri matbuot xizmati tarqatgan bayonotda.
Nursulton Nazarbayev 11 oktyabr kuni Rossiyaning Sochi shahrida boʻlib oʻtgan rasmiy uchrashuvlarda, jumladan MDH davlat rahbarlari Kengashi majlisida ishtirok etdi. Qirgʻiziston nomidan Sochiga bosh vazir Sapar Isakov boshchiligidagi delegatsiya yoʻl oldi. Oʻsha kuni Qirgʻiziston rasmiy matbuoti Sapar Isakov Nazarboyev bilpan uchrashgani va uni qirgʻiz-qozoq chegarasida yuzaga kelgan vaziyat borasida ogohlantirgani haqida xabar tarqatildi.
“Muzokoralardan soʻng prezident Nursulton Nazarbayev Qozogʻiston hukumatiga chegarada yuzaga kelgan masalalarni bartaraf etishga koʻrsatma berdi”,- deyilgan edi Isakovning Facebook’dagi sahifasida 11 oktyabr kechqurun eʼlon qilingan xabarda.
Qozogʻiston bosh vaziri matbuot xizmati bayonotida Qirgʻiziston bosh vaziri Sapar Isakovning Facebookdagi sahifasida prezident Nazarboyev bilan “qirgʻiz-qozoq davlat chegarasidagi vaziyat borasida”gi suhbat borasidagi “axborot talqin qilinishida chalkashliklar” borligini maʼlum qildi.
