Hindiston mamlakatga qochib oʻtgan rohingya musulmonlarini deportatsiya qilmoqchi
Hindiston ichki ishlar davlat vaziri Xansraj Gangaram Axirning maʼlum qilishicha, hukumat mamlakatda noqonuniy maqomda boʻlib turgan rohingya musulmonlariga “ishona olmaydi”, hamda xalqaro bosimga qaramay, ularning deportatsiyasi ustida ish olib borishda davom etadi.
Hindistonda BMT tomonidan roʻyxatdan oʻtkazilmagan taxminan 40 ming rohingya musulmonlarini deportatsiya qilish masalasi avgust boshidan beri muhokama etilmoqda. Hukumat mahalliy hokimiyatlarga mamlakat hududida noqonuniy boʻlib turgan barcha xorijiy fuqarolarni aniqlash va deportatsiya qilish boʻyicha ishlar olish borishni topshirgani haqida xabar bergandi. Muammo Mьyanmaning Rakxayn shtatidagi mojaro keskin tus olgach, yanada ogʻirlashdi.
Hindistonning bu boradagi rejalari BMTning inson huquqlari boʻyicha Oliy komissari Zayd Raad al-Hussayn tomonidan tanqid ostiga olindi. Dehlining javobi esa tushunarsiz boʻldi. Avvaliga, IIVning boshqa bir vakili Kiren Ridjiju seshanba kuni rohingya musulmonlarini deportatsiya qilishi boʻyicha yakuniy rejalar hozircha yoʻqligini maʼlum qildi. Biroq uning hamkasbi Xansraj Gangaram Axir yanada keskin bayonotlar bilan chiqib, Dehli tanqidlarga qaramay, rohingya musulmonlarini deportatsiya qilish boʻyicha rejalarga egaligini tasdiqladi.
“Menga aniqlik kiritishga imkon bering, ular hindlar emas, ular – noqonuniy muhojirlar. Biz ularga ishona olmaymiz”, – degan Axir.
Uning soʻzlariga koʻra, rohingyalar terrorchilik tashkilotlari bilan “baʼzi aloqalar”ga ega boʻlishi mumkin, biroq u hukumatda bu taxminni tasdiqlovchi aniq maʼlumotlar bor yoki yoʻqligiga oydinlik kiritmagan.
“Ularda baʼzi aloqalar boʻlishi mumkin, shuning uchun biz bu haqda gapirmoqdamiz. Hukumatning fikricha, ular tahdid uygʻotadi”, – deya maʼlum qilgan IIV vakili.
Uning qoʻshimcha qilishicha, avvalgi hukumatlar rohingyalarni mamlakatga “kichik sonda” kiritishgan, “biroq endi hukumat ularni bu yerda qoldirmaslikka qaror qildi”. “Ularni bu yerda ushlab turish – millat manfaatlariga xizmat qilmaydi. Hukumat hech qanday bosimga qarab oʻtirmaydi”, – deya maʼlum qilgan Axir.
Biroq, hukumatning rejalariga Hindiston Oliy sudi xalaqit berishi mumkin. Hozirgi paytda oliy sud instantsiyasida hukumatning rohingyalarni deportatsiya qilish boʻyicha rejalariga qarshi daʼvo arizasi koʻrib chiqilmoqda. Sud hukumatdan oʻz pozitsiyasini taqdim etishni soʻradi. Kutilishicha, hukumat buni kelayotgan dushanba kuni amalga oshiradi.
