BMT Xavfsizlik Kengashi Arakan qirgʻinini yana qattiq qoraladi
Birlashgan millatlar tashkilotining xavfsizlik kengashi Birmadagi arakanlik Musulmonlarga qarshi uyushtirilgan zoʻravonliklarni muhokama qilish uchun yana yigʻilish oʻtkazdi. Ammo bu galgi yigʻilish matbuotdan xoli, yopiq eshiklar ortida boʻlib oʻtdi. Sentyabr oyidan boshlab BMT Xavfsizlik Kengashiga raislik qila boshlagan Efiopiyaning BMTdagi doimiy vakili Tekeda Alemu yigʻilishdan soʻng jurnalistlarga bayonot berdi.
“BMT Xavfsizlik Kengashi Birma xavfsizlik kuchlari tomonidan tinch aholiga qarshi kuch ishlatilganligidan tashvishda. U Tinch aholiga qarshi hujumlarni qoralaydi. Kengash Arakandagi zoʻravonliklarni darhol toʻxtatishga va tinch aholini himoya qilishga chaqiradi”, dedi Birma hukumatini mazlumlarga gumanitar yordam koʻrsatishda BMT va boshqa yordam tashkilotlari bilan hamkorlik qilishga chaqirgan Alemu.
BMT bosh kotibi Antonio Guterres ham BMT Bosh Assambleyasining 72-sessiyasidan oldin tashkil qiingan matbuot anjumanida Birmadagi Arakanlik musulmonlarga qarshi zoʻravonliklar haqida toʻxtaldi. U Arakanlik musulmonlarga qarshi qoʻllangan zoʻravonliklarni “nomaqbul ish”, deya atab, Birma hukumatini harbiy amaliyotlarni toʻxtatishga, zoʻravonliklarga chek qoʻyishga va insonparvarlik yordami uchun izn berishga chaqirish bilan kifoyalandi.
Turkiston:
Islom oʻlkalarining rahbarlari Arakan qirgʻini haqida gap ochganda bu masalaning yechimini BMTga havola qilish bilan cheklanishmoqda. Aslida BMT Arakan Musulmonlariga nisbatan qoʻllanayotgan vahshiyliklardan yaxshigina xabardor. U oʻzining Arakan haqida bergan avvalgi bayonotlarining birida “dunyoning eng mazlum xalqi Arakan Musulmonaridir” deya aytib oʻtgan edi. Ammo shunday boʻlishiga qaramay, “faqat tashvish bildirish”, “qattiq qoralash” bilangina cheklanmoqda. Buning sababi nimada?!
BMTga ikki yuzga yaqin davlat aʼzodir. Ammo BMT ulardan faqat doimiy beshta aʼzosini, yaʼni AQSh, Rossiya, Angliya, Xitoy va Frantsiya davlatlarining manfaatlarini himoya qiladi, xususan bular orasida AQShning manfaati birinchi oʻrinda turadi. Mazkur besh doimiy aʼzo davlatlar BMT tarafidan qabul qilinadigan biror qarorga VETO qoʻyadigan boʻlsa, qolgan ikki yuzga yaqin davlatlarning zarracha ham taʼsiri qolmaydi. Qizigʻi shundaki, dunyoning qayerida qon oqayotgan boʻlsa, uning orqasida mana shu besh davlatdan biri turgan boʻladi.
Demak BMTga murojaat qilish mazkur besh davlatga, xususan AQShga murojaat qilish maʼnosini anglatadi. Vaholangki bu zulmlarni amalga oshirayotgan davlatning rahbariga “tinchlikni saqlash boʻyicha nobel mukofoti”ni AQShning oʻzi topshirgan. Shunday ekan, BMTga murojaat qilish va u yerdan tanqid qilish haqida qarorlar chiqartirish musulmonlarning muammosiga yechim boʻladimi?!
