Lavrov Suriya masalasida iordaniyalik hamkasbi bilan uchrashdi
Rossiya Tashqi ishlar vaziri Sergey Lavrov Iordaniya tashqi ishlar vaziri Ayman As-Safadiy bilan Iordaniya poytaxti Ammanda uchrashuv oʻtkazdi. Xabarlarga koʻra, Sergey Lavrov uchrashuv chogʻida Rossiyaning Iordaniya bilan hamohang yoʻnalishga ega ekanligini taʼkidlab oʻtgan.
Mintaqaviy masalalar boʻyicha uchrashuvlar oʻtkazish uchun Ammanga kelgan Rossiya Tashqi ishlar vaziri Iordaniyalik hamkasbi bilan uchrashgandan soʻng mushtarak matbuot anjumani oʻtkazdi. Lavrov Suriya masalasiga doir fikr bildirar ekan, Suriya mojarosini tezroq tugatishga va bu borada har bir fursatdan unumli foydalanishga chaqirdi. Unga koʻra, Suriya masalasida tuzilgan har bir bitim BMT qarorlaridan chetga chiqmasligi lozim.
“Suriyadagi qon toʻkilishini darhol toʻxtatish, insoniy inqirozga yechim topish va BMT qarorlariga muvofiq haqiqiy bitim tuzish lozimdir”, “Xalqaro qonunlarga va mamlakat ichki ishlariga hurmat koʻrsatilishi lozim. Agar Suriyada yangidan tinch hayotga qaytish uchun imkoniyat mavjud boʻlsa, undan unumli foydalanish kerak”, deya taʼkidladi Lavrov.
Ostona muzokaralari doirasida Turkiya va Eron bilan birgalikda urushdan xoli mintaqa tashkil qilish uchun harakat qilinayotganligini bildirgan Rossiya Tashqi ishlar vaziri, bu borada Saudiya Arabistoni ham bor kuchini sarflayotganiga eʼtibor qaratdi.
“Saudiya Arabistoni Suriya inqirozini tugatishga qatʼiy qaror qildi. Shuning uchun u Ostona muzokaralarini qoʻllab quvvatlamoqda”, deya qoʻshimcha qildi Lavrov.
Shuningdek, Lavrov Iordaniya qiroli Abdulla bilan ham foydali uchrashuv oʻtkazganini maʼlum qildi.
