Turkiyadagi 100 ming suriyalikni oʻz yurtiga qaytarish loyihasi
Turkiyaning ijtimoiy siyosat va oila ishlari boʻyicha vazirligi BMTning Qochqinlar boʻyicha Oliy komissari bilan hamkorlikda Suriyalik qochqinlarni oʻz diyorlariga qaytarish qonun loyihasi ustida ish olib bormoqda. Ushbu loyiha joriy yilning oxiriga qadar 100 ming suriyalikni oʻz yurtiga qaytarish masalasini oʻz ichiga oladi. Bu haqida Turkiyada chiqadigan “Hurriyat” gazetasi xabar tarqatdi.
Gazetaning yozishicha, Turkiya kuchlari “Ozod Suriya armiyasi” bilan hamkorlikda Suriya shimolida amalga oshirgan “Furot qalqoni” harbiy amaliyoti doirasida kamida ikki ming kvadrat klometr yerni IShIDning qoʻlidan ozod qilishga muvaffaq boʻlgan. Endigi masala suriyalik qochqinlarni oʻz diyorlariga qaytarish ustida ketmoqda.
“Hurriyat”ga koʻra, Turkiya va BMT hamkorligida ishlab chiqilayotgan loyiha 100 ming kishini Suriyaning al-Bob shahariga qaytarish uchun zaruriy shart sharoitlar yaratishni oʻz oldiga maqsad qilib qoʻygan. Har ikki tarafning tashabbusi bilan tijoriy doʻkonlar, novvoyxonalar ochiladi, aholi toza ichimlik suvi bilan taʼminlanadi va mahalliy maktablar va shifoxonalar qayta tiklanadi.
Statististik maʼlumotlarga koʻra, Suriyadagi janglar sababli oʻz yurtini tark etib Turkiyaga qochib oʻtgan Suriyalik qochqinlarning soni 3,5 million kishini tashkil etadi.
