Tramp Rossiyaga qarshi sanktsiyalar haqidagi qonunni imzoladi
Amerika OAV xabar qilishicha, AQSh prezidenti Donald Tramp Rossiya Federatsiyasiga qarshi yangi sanktsiyalar toʻgʻrisidagi qonunni imzoladi. AQSh vitse-prezidenti Mayk Pens ham bu maʼlumotni tasdiqladi.
AQSh Senati oʻtgan oyda Rossiya, Eron va KXDRga qarshi sanktsiyalarni kuchaytiruvchi qonun loyihasini qabul qilgan edi. Bundan avvalroq, Vakillar palatasi aksar koʻpchilik ovoz bilan uni tasdiqlagandi.
Tramp Rossiyaga qarshi sanktsiyalar kengaytirilishini nazarda tutuvchi oʻzi imzolagan qonunni nuqsonli deb atagan.
“Eron, Shimoliy Koreya hamda Rossiyaning tajovuzkor va beqarorlashtiruvchi harakatlarini jazolovchi va tutib turuvchi qatʼiy choralarni qoʻllab-quvvatlasam ham, bu qonun juda nuqsonlidir. Qonun loyihasini tezroq qabul qilishga intilarkan, Kongress unga bir qator konstitutsiyaga zid holatlarni kiritdi”,- degan Tramp.
Bundan tashqari, Tramp davlat rahbarini Rossiyaga qarshi sanktsiyalarni bekor qilish borasidagi mutlaq vakolatidan mahrum qilishga boʻlgan urinishni tanqid qilgan.
Tramp qonun realizatsiyasi Ukraina inqirozini bartaraf etishga toʻsqinlik qilmasligiga umid bildirgan.
Rossiya iqtisodiyotiga qarshi yoʻnaltirilgan qonun loyihasi sohaviy sanktsiyalarni koʻzda tutadi. Xususan, u Amerika sanktsiyalari roʻyxatiga kiritilgan Rossiya banklarini moliyalashtirishning eng yuqori muddatini imkon qadar qisqartirib, 14 kunga tushiradi. Neftegaz sohasini moliyalashni 60 kungacha qisqartiradi. Qolaversa, bu sanktsiyalar texnologik cheklovlarni oʻz ichiga qamrab olgan.
Bu galgi sanktsiyalar oʻtgan safargisidan bir necha kuchli asoratlarga ega boʻlishi mumkin. Yangi sanktsiyalarga koʻra, rus banklari va moliya institutlarining Gʻarbdan 2 haftadan ortiq muddatga mablagʻ ola olmasligi Rossiya iqtisodiyotini, energetika sohasini ogʻir ahvolga tushirib qoʻyadi va uzoq muddatli istiqbolda Rossiya iqtisodiyotiga jiddiy zarba boʻladi.
