AQSh Afgʻonistondagi strategiyasini qayta koʻrib chiqmoqda
AQSh Afgʻonistondagi harbiy operatsiyalarni qayta tiklash imkoniyatlarini koʻrib chiqmoqda. “NBC” telekanali bergan xabarga koʻra, AQSh mudofaa vazirligi rahbariyati Afgʻonistonda “Tolibon” va “Haqqoniy tarmogʻi” guruhi jangarilarini yoʻq qilish maqsadida harbiy operatsiyalarni tiklash imkoniyatini koʻrib chiqmoqda.
Pentagondagi manbalarning maʼlum qilishicha, AQSh va Oq uy harbiy idorasi hozirda Amerikaning Afgʻonistondagi strategiyasini qayta koʻrib chiqmoqda. Bunda AQSh prezidenti Donalьd Trampning milliy xavfsizlik boʻyicha yordamchisi Gerbert Makmaster faol ishtirok etmoqda. Iyul oyida Amerika yetakchisiga Afgʻonistondagi “Tolibon” va “Haqqoniy tarmogʻi” harakatlariga qarshi operatsiyalarning qayta tiklanishiga doir takliflar taqdim etilishi kutilmoqda.
Rasmiy maʼlumotlarga koʻra, bugungi kunda Afgʻonistonda xalqaro koalitsiyaning taxminan 13 ming harbiy xizmatchisi bor, amerikalik 8,4 ming askar va ofitser ham shular jumlasidandir. Ular asosan Afgʻonistondagi harbiylarni oʻqitish bilan shugʻullanishadi, shuningdek harbiy maslahatchi rolida namoyon boʻlishadi. NBC’da taʼkidlanishicha, bugungi kunda Amerika harbiy kuchlari asosan “IShID” va “Al-Qoida” terrorchi guruhlariga zarba berishmoqda, toliblarga esa – kamdan-kam holatlarda.
Maʼlumotlarga koʻra, Afgʻonistonda taxminan 35 ming “Tolibon” harakati jangarisi mavjud. “IShID” tomonda esa respublikada atigi bir necha yuz kishi jang qilmoqda. Holbuki, Afgʻoniston hukumati uchun toliblar koʻproq tahdid tugʻdiradi, deyiladi “CNN” xabarida.
