Tramp mudofaa vaziriga AQShning Afgʻonistondagi qoʻshinlari sonini oʻzgartirish huquqini berdi
“Reuters” axborot agentligi xabariga koʻra, AQSh prezidenti Donalьd Tramp Pentagon rahbari Jeyms Mettisga AQSh qurolli kuchlarining Afgʻonistondagi qoʻshinlari sonini oʻzgartirish vakolatini berdi.
Axborot agentligining taʼkidlashicha, ayni vaqtda qoʻshinlar sonini oʻzgartirishga qaror qilinmagan. Hozir Afgʻonistonda 8,4 ming amerikalik harbiy joylashtirilgan. Tramp shunga oʻxshash qarorni Iroq va Suriyadagi qoʻshinlarga nisbatan aprelda qabul qilgandi.
Pentagon bu masala yuzasidan izoh bermadi.
May oyi oʻrtalarida AQSh kongressida mudofaa vazirligining razvedka boshqarmasi direktori, general-leytenant Vinsent Styuart AQSh va NATO Afgʻonistondagi vaziyatni barqarorlashtirish boʻyicha strategiyasini oʻzgartirishi zarurligini aytgandi.
“Biz avvalgiga nisbatan mutlaq boshqacha yoʻl tutishimiz lozim”,- deb aytgandi Styuart. Uning aytishicha, agar AQSh va NATO oʻz strategiyasini oʻzgartirmasa, unda “Tolibon” jang maydonlarida sezilarli muvaffaqiyatlarga erishishi mumkin.
Avvalroq The Washington Post nashri qabul qilinadigan variantlardan biri sifatida Afgʻonistonga kamida 3 ming amerikalik harbiy va zobitni yuborish va NATOga ham shuncha qoʻshin yuborish chaqirigʻi bilan murojaat qilingan boʻlishi mumkinligini maʼlum qilgan edi. Nashr AQSh maʼmuriyati vakiliga iqtibos keltirgan holda Tramp Afgʻonistonda “yutishni boshlash” istagidaligi va uni bu borada maʼmuriyatining yuqori lavozimli mansabdor shaxslari qoʻllab-quvvatlayotganlarini taʼkidlab oʻtgandi.
