Saudiya Arabistoni va Turkiya kabi Islom oʻlkalarining rahbarlari yaxshilik kutayotgan AQShning yangi maʼmuriyati birinchi qadamlaridayoq musulmonlarning boshiga balo boʻlishni boshladi. “Eng avvalo Amerika” shiori bilan oʻz faoliyatini boshlagan AQSh prezidenti Donald Trampning ilk 100 kun ichida tashqi siyosatda qabul qilgan qarorlari Suriya, Yaman, Afgʻoniston va Iroqda yuzlab tinch fuqarolarning yostigʻini quritdi.
Suriyada musulmonlar farz namozini ado etayotgan masjidning havodan hujumga tutilib, vayron qilinishi oqibatida 63 nafar nomozxon halok boʻldi. AQSh Markaziy kuchlari qoʻmondonligi hujumni oʻz zimmasiga oldi.
Shuningdek, 23 mart kuni Mosulda 200 kishining hayotdan koʻz yumishiga sabab boʻlgan hujumni ham AQSh oʻz zimmasiga oldi. Mazkur hujum Iroq armiyasining talabiga binoan amalga oshirilganligini bildirgan AQSh, hujum uchun koordinat nuqtalarini Eronga bogʻliq “Hashdi Shabi” tashkilotidan olganligini tasdiqladi.
Raqqani qamal qilish jarayonida Furot daryosining janubida joylashgan Mansura shahridagi maktab binosiga uyushtirilgan hujumda esa 40 nafar qochqin halok boʻldi. AQSh hech bir dalil keltirmagan holda bu maktab binosi IShID tarafidan qoʻllanilganligini daʼvo qilib, tinch fuqarolar qurbon boʻlganligini rad etdi.
AQSh havo kuchlari Mosul va Raqqadan chiqib ketayotgan minglagan odamlarni IShID bahonasida V-52 ogʻir jangavor samolyotlar bilan hujumga tutdi. natijada 3 kun davomida 600ga yaqin fuqaro halok boʻldi.
29 yanvar kuni AQSh maxsus operatsiyalar guruhi Yamanning Al-Bayda shahridagi binoga reyd uyushtirdi. Reyd davomida yuzaga kelgan toʻqnashuvda 39 kishi halok boʻldi.
AQSh havo kuchlari Afgʻonistonga “bombalarning onasi” nomini olgan eng katta bombani tashladi. 14 aprel kuni AQSh havo kuchlari Afgʻonistonning Nangahor shahrida tinch aholi yashaydigan mintaqani nishonga olib, amalga oshirgan hujumda 94 kishi hayotdan koʻz yumdi.
Tramp Oq uyda bergan bayonotida bu hujumdan juda faxrlanishini bildirib, “yana bir muvaffaqiyatli amaliyot”, deb atadi.
