Turkiyaning qurolli kuchlariga tegishli samolyotlar Iroq va Suriyada PKK va YPGni nishonga olishi AQSh tomnidan ham, AQSh boshchiligidagi koalitsion davlatlar tomonidan ham ijobiy qabul qilinmadi. Bu haqida AQSh Davlat departamentining muvaqqat voizi Mark Toner kundalik matbuot anjumanida maʼlum qildi. Turkiya uyushtirgan havo hujumlaridan AQShning chuqur tashvishga tushganligini bildirgan Toner oʻz andishalarini Turkiya hukumatiga yetkazganligini ham aytib oʻtdi.
“Turkiyaning Iroq va Suriyada uyushtirgan havo hujumlariga doir AQShga ham, yoki IShIDga qarshi kurashayotgan koalitsiya davlatlariga ham yetarlicha oldindan xabar berilmagan”, dedi Toner.
Biroq Turkiya prezidenti Rajab Toyyib Erdugʻon PKK va YPGni nishonga olish haqida hujumdan avval Moskva va Arbil hamda Vashingtonni xabardor qilganligini aytgan edi.
AQSh Mudofaa vazirligi Pentagon ham xuddi shunga oʻxshash bayonot berdi. Pentagon soʻzchilaridan biri mayor Adrian Rankine Gallovay oʻzining yozma bayonotida Turkiyaning AQSh bilan ittifoqdosh boʻlgan kuchlarni hujumga tutishi IShIDga qarshi koalitsiya davlatlari tomonidan ijobiy qabul qilinmaganligini iddao qildi. Chunki Gallovayga koʻra, Turkiya koalitsiya davlatlariga oʻz hujumi haqida oldindan xabar qilmagan.
“Turkiya kuni kecha shimoliy Suriya va Iroqda Amerika Qoʻshma Shtatlari va koalitsiya bilan yetarli koordinatsiya tashkil qilmay turib, amalga oshirgan havo hujumlari haqida juda qaygʻudamiz. Tashvishimizni Turkiya hukumatiga bildirdik. Bu havo hujumlari koalitsiya davlatlari tarafidan ijobiy qabul qilinmadi”, dedi Gallovay.
Turkiston:
Turkiya YPGga qilinadigan hujumlar haqida AQSh va Rossiya kabi davlatlarga oldindan maʼlumot beriladigan boʻlsa, hujumning hech qanday maʼnosi qolmaydi. Chunki AQSh yoki Rossiyaga xabar qilish YPG va PYDning oʻziga oldindan xabar qilib qoʻyish demakdir. Zero AQSh ham Rossiya ham ularning ittifoqdoshlaridir. Bu haqida ularning oʻzlari ochiq aytishmoqda.
Demak bu yerda shunday holat mavjud: Turkiya terrorga qarshi kurashda AQShning ittifoqchisidir. Ayni paytda u YPG va PYDni terrorchi tashkilot deb biladi. Biroq terrorga qarshi kurashda Turkiyaning ittifoqchisi boʻlgan AQSh esa YPG va PYDga har tomonlama ochiq suratda yordam berib keladi. Hatto Turkiya prezidenti Amerikaga safar qilib, Oq uyda mehmon boʻlib turgan paytda AQSh rasmiylari mazkur tashkilotarni oʻzlarining hamkori ekanligini maʼlum qilishdi. Shunday ekan, Erdugʻonning YPG va PYDni terrorchi tashkilot deb jar solishi va buning ortidan mana shu tashkilotlar bilan ochiq hamkorlik qilib, ularni dastaklab kelayotgan AQSh va Rossiyani doʻstim deb bilishini qanday tushinish mumkin?!
AQShning bu tashkilotlar bilan hamkorligi Obama davrida ham bor edi, Tramp davrida ham davom etib kelyapti. Faqat yoʻnalish uslublarida biroz farq bor. Yaʼni AQShda demokratlar partiyasi hokimiyatga kelganda oʻzining tashqi siyosatini hiyla-nayranglar va diplomatik yoʻllar bilan amalga oshirishga harakat qiladi. Respublikachilar esa ularning aksi. Chunki ular oʻz istaklarini malaylaridan qattiq qoʻllik bilan talab qilishadi. Oʻzlariga qarshi biror soʻz aytilishiga yoʻl qoʻyishmaydi. Shuning uchun YPG va PYD masalasida Erdugʻonning Obama davridagi AQShga qarata “Ey Amerika! Sen biz bilan doʻstmisan yoki terroristlar bilanmi?!”, degan baland parvoz bayonotlarini hozirgi Tramp davrida eshitish oʻta mushkul.
