Yo namoz yoki ish
“CA-NEWS” saytining xabar qilishicha, Turkmanistonda namoz oʻqigan harbiy tizim xodimlarini hamda namoz oʻqishni tashlash talabini bajarishdan bosh tortgan davlat xizmatchilarini ishdan boʻshatib yuborish holatlari koʻpayib bormoqda.
Xavfsizlik sabablariga koʻra ismini oshkor qilishni istamagan turkmanistonlik, endilikda sobiq xarbiyning maʼlum qilishicha, namoz oʻqishni tashlash talabini rad etgani sababli qurolli kuchlar safidan boʻshatib yuborilgan. Uning soʻzlariga koʻra, avvaliga ish joyida namoz oʻqimaslikni talab qilishgan, keyin esa uyida tintuv oʻtkazib, Qurʼon kitobini olib ketishgan.
Sobiq harbiyning aytishicha, boʻlib oʻtgan ishlarga qaramay u namoz oʻqishda davom etgan. Shundan soʻng uni Mudofaa vazirligiga chaqirtirishgan hamda undan tushintirish xati va ishdan boʻshash toʻgʻrisida ariza yozishni talab qilib, ishdan boʻshatib yuborishgan. Bundan tashqari, undan oilasi bilan yashayotgan vazirlik tomonidan berilgan uyni boʻshatib qoʻyishni talab qilishgan.
Turkiston:
Turkmanistonning sobiq prezidenti, marhum Saparmurod Niyozov qalamiga mansub “Ruhnoma” kitobi nashr qilinganidan soʻng ommaviy axborot vositalarida “Turkmanboshi”ni paygʻambar deb atala boshlanishiga qarshi turkmanistonlik diniy ulamo Xojaahmad Oʻrozqilichev “Bu musulmonlar eʼtiqodiga zid” ekanligini aytib chiqishi ortidan Turkman hukumati Islom diniga qarshi kurashni boshlab yuborgan edi. Ulamoning shu soʻzlaridan soʻng turkman hukumati Oʻrozqlichev tarjimasidagi turkman tilida chop etilgan 40 ming nusxa Qurʼonni yoqishga buyruq berdi. Shu bilan kifoyalanib qolmagan rasmiy hukumat poytaxt Ashxoboddagi masjidlarni teng yarimini buzib tashladi va oʻz eʼtiqodida sobit turgan musulmonlarni turli xil ayblovlar bilan qamoqqa tashlay boshladi.
Turkmanboshidan soʻng hokimiyat tepasiga kelgan Gurbanguli Berdimuhammedov Islom va musulmonlarga qarshi kurashni yanada kuchaytirib yubordi. U endilikda nafaqat ulamo va masjidlarga qarshi, balki jamiyatda islomiy koʻrinishlarga qarshi kurashni boshlab berdi. Hukumat buyrugʻiga binoan Doshoʻgʻiz viloyatida kuch organlari soqol qoʻygan musulmonlarga qarshi “ov”ni boshlab yuborishdi. Milliy xavfsizlik boshqarmasi va yoʻl politsiyasi xodimlari soqol qoʻygan va 50 yoshga toʻlmagan musulmon erkaklarni ushlab, maxsus suhbatdan oʻtkazish ortidan, soqollarini majburan olib tashlashdi va hatto ularni aroq ichib, choʻchqa goʻshti yeyishga majburlashdi. Kuch organlari talabini bajarmagan eʼtiqodli musulmonlar esa hech qanday sud va tergovsiz 7-8 yilga ozodlikdan mahrum etildi. Buning natijasida esa rejim qamoqxonalari musulmonlar bilan toʻlib ketdi.
Huquq faollari bergan maʼlumotlarga koʻra, birgina qattiq rejimli “Ovadon Tepa” turmasida 300 ga yaqin dindor mahkumlar bor. Ularga yaqinlari bilan uchrashish, tashqaridan biror narsa olib kiritish taqiqlanadi.
Allohga qarshi qilgan shuncha jinoyatlari kamlik qilganidek endilikda rasmiy hukumat namoz oʻqigan musulmonlarga qarshi bosim oʻtkazishni boshlab yubordi.
