Amerika, Rossiya va Turkiya bosh qo’mondonlari Antaliyada uchrashuv o’tkazdi
Turkiya qurolli kuchlari bosh shtab boshqarmasining rahbari general Xulusi Akarning da’vatiga binoan AQSh armiyasi bosh qo’mondoni general Jozef Dunford va Rossiya Federatsiyasi bosh shtab boshqarmasining rahbari general Valeriy Gerasimov rasmiy safar bilan Turkiyaga bordi.
Uch davlatning bosh qo’mondonlari ishtirokida Suriya va Iroq masalalari bo’yicha uchrashuv bo’lib o’tdi. Turkiyaning Antaliya shahrida uyushtirilgan uchrashuvdan so’ng bayonot bergan Turkiya bosh qo’mondoni Xulusi Akar uchrashuv chog’ida Suriyada faoliyat olib borayotgan terrorchi (Jihodiy) guruhlarga qarshi kurashlar haqidagi so’nggi vaziyat muhokama qilinganligini ma’lum qildi.
“Taraflar Suriya va Iroqdagi mintaqaviy xavfsizlik masalalari, xususan Suriyada faoliyat olib borayotgan terrorchi guruhlarga qarshi kurashlar haqidagi so’nggi vaziyat yuzasidan fikr almashdilar. Bundan tashqari, kelgusi davrda barcha terrorchi tashkilotlarga qarshi yanada samarali kurash olib borish maqsadida uch davlat qurolli kuchlari o’rtasida yuzaga kelishi mumkin bo’lgan salbiy hodisalarning oldini olish borasida qo’llaniladigan qo’shimcha chora-tadbirlar ham ko’rib chiqildi”, deyiladi Turkiya qurolli kuchlar bosh shtab boshqarmasi tarafidan berilgan yozma bayonotda.
Ayni paytda AQSh davlat departamentining matbuot kotibi Mark Toner Suriyaning Manbich shahrida bir biriga yaqin joylashgan bir necha davlatlarga oid qurolli kuchlar o’rtasida kutilmagan vaziyat yuzaga kelishidan xavotir bildirdi.
“Kichik bir maydonda bir biriga yaqin joylashgan qurolli kuchlar o’rtasida keraksiz salbiy hodisalar yuzaga kelishini istamaymiz, shundoq ham, vaziyat tang ahvolda”, dedi Mark Toner.
