Daʼvatdan qaytayotgan daʼvatchilar avtohalokatga uchrab, bir kishi halok boʻldi
“Turmush” nashrining xabar qilishicha, Bishkek-Oʻsh avtoyoʻlining 335-chaqirimida sodir boʻlgan avtohalokat natijasida halok boʻlgan va jarohatlangan fuqarolarning shaxsi aniqlandi.
FVV matbuot xizmatining xabariga koʻra, avtohalokat 10 fevral tungi soat 2lar chamasida Qorakoʻl shahrining Ketme-Too qishlogʻida sodir boʻlgan. “Mersedes” rusumli mashina xaydovchisi rul boshqaruvini yoʻqotib, yoʻl chetidagi toʻsiqqa borib urilgan. Mashinada Oʻsh viloyati Aravon tumanining turgʻunlari boʻlib, ular Bishkekdan daʼvatdan qaytib kelishayotgan boʻlgan.
Avtohalokat natijasida 1931-yilda tugʻilgan Boskanbayev Abdiraim halok boʻldi.
Jarohatlanganlar:
1.Teshebayev Akunjan, 1996-yili tugʻilgan, xaydovchi:
2.Xalilov Muhammadjon, 1996-yili tugʻilgan:
3.Jabarov Sanjarbek, 1972-yili tugʻilgan:
4.Qobulov Moʻydinjon, 1962-yili tugʻilgan.
Jarohat olganlar Uchterak qishlogʻidagi shifoxonaga yotqizilgan.
Turkiston:
رَاجِعونَ إِلَيْهِ وَإِنَّا لِلّهِ إِنَّا
“Albatta biz Allohning (bandalarimiz) va albatta biz u zotga qaytguvchilarmiz”
Allohning sinov dunyosiga kelgan har bir jon bir kun kelib oʻlim taʼmini totib koʻrishi muqarrar. Kimdir oʻzi uchun belgilangan muddat (ajal) yetib kelgunga qadar oʻz imkoniyatini oʻtkinchi dunyo matohlarini qoʻlga kiritish uchun sarflasa, yana kimdir bu muddatdan foydalanib oʻzidan ilm, sadaqai joriya, yaxshi nom va solih farzandlar va talabalar qoldirishga intilish orqali Oxirati uchun zahira toʻplash gʻamida oʻtkazadi.
Bugun tunda avtohalokatga uchragan birodarlarimiz ham Alloh roziligi yoʻlida ahli oilasi, farzandlarini Oʻziga omonat qilib tashlab chiqib, Islom dinini odamlarga yetkazish maqsadida safarga chiqishgan va oʻz zimmalaridagi vazifani baholi qudrat bajarib ortga qaytishayotgan boʻlgan.
Abu Hurayradan roziyallohu anhudan rivoyat qilinadi. Rasululloh sollallohu alayhi va sallam: “Siz kimlarni shahid, deb hisoblaysiz?” deganlarida, sahobalar: “Ey Allohning rasuli, kimki Alloh yoʻlida oʻldirilsa, u shahiddir”, deyishdi. Rasululloh sollallohu alayhi va sallam: “Unday boʻlsa, mening ummatimda shahidlar oz ekan-da!” dedilar. Sahobalar: “Unda shahidlar kim, Ey Allohning rasuli?” deyishdi. Shunda Rasululloh sollallohu alayhi va sallam: “Kim Alloh yoʻlida oʻldirilsa, u shahiddir. Kim Alloh yoʻlida vafot etsa, u shahiddir. Kim vaboga chalinib oʻlsa, u shahiddir. Kim qorin ogʻrigʻi bilan oʻlsa, u shahiddir. Kim choʻkib oʻlsa, u ham shahiddir”, dedilar. Imom Muslim rivoyati.
Biz, Allohning qazoi qadariga iymon keltirgan holda Oʻzining yoʻlida safarga chiqib vafot etgan Boskanbayev Abdiraim akaning gunohlarini magʻfirat qilishini, qilgan soleh amallarini oʻziga hamroh qilib, jannat kengliklari bilan rizqlantirishini soʻraymiz.
Uning oila aʼzolariga oʻzimizning chuqur hamdardligimizni izhor qilib, ularga Allohdan chiroyli sabr va bu sabr ortidan boʻladigan ulkan ajrlar tilab qolamiz.
Avtohalokatda jabrlanganlarni tez kunlarda shifo topib oilalari bagʻriga qaytishini va Allohning roziligi yoʻlida qilayotgan daʼvatlarini davom ettirishlarini, bu yoʻlda xormay-tolmay harakat qilishlarini tilaymiz.
