Qirgʻiziston iqtisodi kabi “Dordoy” bozori ham inqirozga yuz tutmoqda
2016 yili Bishkekdagi eng yirik “Dordoy” bozorida 6 mingta savdo shahobchasi yopildi. Bu haqida 25 yanvar kuni boʻlib oʻtgan Bishkek meriyasi yigʻilishida shahar meri Albek Ibraimov maʼlum qildi. Bozorda savdo oʻrinlarining yopilishiga tikuvchilik sohasida ishlaganlar va savdo-sotiq bilan shugʻullanganlarni ozayishi sabab boʻlyapti. Albek Ibraimov bunday vaziyat davom etishini aytib oʻtdi. Mazkur bozorda 18 ming 300ta konteyner boʻlsa, oʻtgan yili ularning 6 mingtasi yopilgan.
Turkiston:
Birgina “Dordoy” bozorining oʻzida 6 mingta konteynerning yopilishi bu – olti mingta oila daromad manbasidan mahrum boʻlganligini va eng kamida 12 mingta odam Rossiyadagi mehnat muhojirlari armiyasi safiga qoʻshilganligini anglatadi.
Qirgʻiziston hukumati mamlakatni Yevroosiyo iqtisodiy ittifoqiga olib kirishida ham, Rossiya tomonidan tayyorlangan yoʻl xaritasini tasdiqlashda ham xalq fikrini inobatga olmadi. Yoʻl xaritasini hukumatdagi sanoqli amaldorlardan boshqa hech kim, hatto deputatlar ham koʻrishmagan boʻlsada, yoʻl xaritasi tasdiqdan oʻtdi va Qirgʻiziston YeOII aʼzo boʻldi.
Xalqning xohish-istagiga qarshi borib, mamlakatni YeOIIga olib kirgan mamlakat rahbariyati bu qadam muvaffaqiyat keltirishi, Ittifoqqa kirgandan soʻng Rossiya va Qozogʻiston bilan savdo hajmi keskin ortishini vaʼda qilgan edi. Amalda esa, mutlaqo aksi boʻlib chiqqanligini vaqt koʻrsatib turibdi.
Mamlakatning YeOIIga aʼzo boʻlib kirishi oʻzining salbiy oqibatlarini koʻrsatishda kechikmadi. Bugungi kunda oʻn minglab odamlarni ish bilan taʼminlagan “Dordoy”, “Qorasuv” bozorlari deyarli inqiroz yoqasiga kelib qoldi. Qirgʻiziston iqtisodini asosi boʻlgan reeksportni kamayib ketishi natijasida esa davlat byudjetidagi kamomad yildan-yilga oshib boryapti. Rasmiy hukumat esa hech uyalmay, bu qiyinchiliklar vaqtinchalik ekanligi, uch-toʻrt yildan keyin oʻtib ketishini aytmoqda. Bu uch-toʻrt yil mobaynida esa yoʻgʻon choʻzilib, ingicha uzilishi bilan hech kimning ishi yoʻq.
